پوما

پوما آلمانی څو ملیتي شرکت دی، دا شرکت سپورټي بوټ او همدارنګه سپورټي کالي جوړوي. مرکزي شرکت یې د المان د باورایای په هرزوګنوراش کې دی. دا شرکت په ۱۹۲۴ کال کې د ادولف او رودلف داسلر لخوا جوړ شوی و، کله چې د دغو دوو وروڼو ترمنځ اړیکې خرابې شوې، نو اړ شول چې سره بېل شي. په ۱۹۴۸ کال کې یې هر څه وویشل او شرکت دوې برخې شو. په یوه یې اډيډاس نوم کېښود او په بل باندې یې پوما. پوما او اډيډاس دواړه په یوه ښار کې دي چې په یوه وخت کې یې ښه رقابت درلود.

پوما د فوټبال بوټ جوړوي، همدرانګه د ډېری فوټبالستانو مالي ملاتړ هم کوي. له دې ډلې، اوزه ‌بیو، یوهان کرایف، دیگو مارادونا، لوتار ماتئوس، کنی دالگلیش، تیری آنری، روبر پیرس، اولیویه ژیرو، مارکو رویس، مارکو وراتی، جیانلوییجی بوفون، ماریو بالوتلی او دیگو گودین دي.

وروسته له دې چې رادلف داسلر له خپل ورور بېل شو، نو  د لومړي ځل لپاره یې د شرکت نوم روډا کېښود او له هغه وروسته یې د شرکت نوم پوما کړ. دغه شرکت خپله لومړنۍ لوګو عجیب ډيزاین کړه، دایره وه، په دایره کې د ډي توری لیکل شوی و، د ډي له مینځه پړانګ ترپ کړي وو او په همدې کال یاد شرکت په همدې لوګو ثبت شو.

پوما شرکت په ۱۹۴۸ کال کې د رادلف داسلر لخوا جوړ شو، هغه یې د خپل ورور رودولف په مرسته په ۱۹۲۴ کال کې د سپورټي بوټونو پر تولید لاس پورې کړ. رودولف وروسته له دې چې له خپل ورور بېل شو، پوما شرکت یې جوړ کړ.

پلار یې د بوټو د تولید په یوه ځای کې کار کاوه، مور یې پائولین د کریستفر میرمن بیا بیا د کالیو د مینځلو یو کار ځای اداره کاوه، رادلف دوسلر همغه وخت چې کله ښوونځی خلاص کړ، له خپل پلار سره یې د بوټو په کارځای کې کار پیل کړ. وروسته له دې چې له دویمې نړیوالې جګړې راستون شو، د یوه چینايي شرکت مدیر شو، وروسته یې په آلمان کې د چرم په بازار کې ښه نوم پيدا کړ.

داسلر چې کله له لومړۍ نړیوالې جګړې راستون شو، نو د خپلې مور د کالیو مینځلو په کارځای کې یې د بوټونو په تولید لاس پورې کړ. وروسته په ۱۹۲۴ کال کې آوراخ ته راستون شو او له خپل ورور سره یې په ګده د داسلر د بوټو د تولید کارځای جوړ کړ.  ورووسته یې بیا له خپلې مور سره په مشوره د کالیو د مینځلو په دوکان کې د بوټو په جوړولو پیل وکړ، هغه وخت د برق ستونزه وه، نو دوی اړ وو چې هلته بایسکل ته ورته له محلې جوړې شوې آلې د هنډل  وهلو یا په وسیله د خپل واړه کارځای د ځينو کارونو لپاره برېښنا تولید کړي.

د ۱۹۳۶ کال په اوړي کې داسلر له څو جوړو بوټو سره ولاړ د امریکا- افریقا د المپیک نړیوالو سیالیو مرکز ته، ده هڅه کوله څو دوی په دې باور کړي چې د دوی بوټونه ښه کیفیت لري او باید د المپیک له لوري د ورزشي ښو بوټونو په بڼه ومنل شي. وروسته هلته د المپیک د یوه لوبغاړي او تل جسي اونز سره دې موافقې ته ورسید چې دی به هغه سپانسر کوي او په مقابل کې به یې دې ده د اغوستن توکي په سیالۍ کې اغوندي. په یادو سیالیو کې اونز د سرو زرو ۴ مډاله واخیستل او د سیالیو په پای کې یې وویل چې دې ده د بریا علت د داسلر بوټانو په پښو کولو کې و. همدا خبره وه چې له دې وروسته د نړۍ له ګوټ ګوټ داسلر ته غوښتنلیکونه لېږل کېدل او د نوو بوټانو فرمایشونه ورته راتلل. سلګونو ورزشکارانو دا هیله لرله چې داسلر ورته بوټان جوړ کړي. همدا وو چې تر دویمې نړیوالې جګړې مخکې دواړو ورورڼو هر کال تر ۲۰۰ زره جوړه بوټان پلورل او تولیدول.

له دویمې نړیوالې جګړې وروسته دواړه وروڼه له نازي حزب سره یو ځای شول، خو رادلف وکړی شول چې د یاد حزب لوړو پوړیو ته ورسېږي. وروسته د دواړو وروڼو تر منځ اختلاف پیدا شو او دا ستونزه ورځ تر بلې ډېرېدله. دوی دواړو د نازیانو په اړه متخلف نظرونه لرل او په همدې یې تر منځ واټن ډېر شو او د بوټونو د تولید کاروبار خو بیخي په ټپه ودرید. وروسته له دې چې رادلوف امریکايي سرتېرو د اس اس مسلح د غړي په تور ونیو، آدولف یوازې پاتې شو، خو وروسته دا تور ورپورې شو چې هغه یې خپل ورور رادولف پر امریکایانو وپلورلو.

د داسلر وروڼو کارځای چې د دویمې نړیوالې جګړې په اوږدو کې یې د ټانک ضد د وسلو د تولیدي فابریکې په توګه کار کاوه، د امریکایانو لخوا ويجاړه شوه. خو وروسته له دې چې د آدولف میرمنې په محکمه کې داسې ادعا وکړه چې ګواکې د کمپنۍ کارکوونکو غوښتل بوټ جوړ کړي، خو نازیانو د وسلو جوړولو ته اړ ایستلي وو، کارکوونکي یې وبښل شول او کارځای همسې ویجاړ پاتې شو، چې ورو ورو یې په کار پیل وکړ. وروسته له دې چې امریکايي ځواکونو آلمان اشغال کړ، ډېرو یې بېرته د داسلر بوټونو اخیستلو ته مخه کړه.

ورورسته دواړه وروڼه په رسمي توګه له یو بل بېل شول، رادولف د رودا په نامه شرکت جوړ کړ، چې د نامه مخفف یې و، وروسته وروسته دا شرکت په پوما بدل شو، آدولف هم په ۱۹۴۹ کال کې آدیداس چې نوم یې د خپل نامه مخفف و جوړ کړ. سره له دې چې خلکو دې نامه ته بېل تعبرونه او تعریفونه جوړ کړل، د بېلګې په توګه، امریکایانو به ویل د دې نامه مانا ده: هره ورځ باید د سپورټ په اړه خیال وکړو (All Day I Dream About Sport))، خو داسې نه وه هغه یوازې د آډولف داسلر او د هغه د کورني نوم لنډیز و.

پوما او ادیداس له بېلتون وروسته په رسمي توګه خپل رقابت پیل کړ، په هغه ښار کې چې پوما او اډيډاس کمپنۍ وې، د کاږه ورمېږ د ښار په نامه مشهور شو، علت یې دا و چې هر چا به د نورو پښو ته کتل چې ته ودرېږه اډیډاس بوټ یې په پښو دي که پوما. په هغه وخت کې اس وی ای له اډيډاس کمپنۍ ملاتړ وکړ او دوی ته یې اجازه ورکړه چې په لوبو کې خپل بوټ وپلوري. ایف سي له پوما بوټو ملاتړ وکړ او خپلو لوبغاړو ته یې د دوی بوټ ور په پښو کړل. په ۱۹۴۸ کال کې چې کله لومړنۍ نړیواله جګړه پای ته ورسېده، نو د فوټبال لومړنۍ سیالي تر سره شوه، د غربي آلمان د فوټبال څو غړو د پوما بوټ په پښو کړي وو، په دې ډله کې نو تر دویمې نړیوالې جګړې وروسته په نړیواله لوبه کې لومړني ګل وهونکي هربرت بوردنسکي هم پوما بوټ پښو کړي وو. دا نو هغه څه وو چې اډيډاس په رقابت کې مات شو او د پوما شهرت لوړو پوړیو ته ورسېد.

پوما اوس د نړۍ په ګوټ ګوټ کې لس زره کارکوونکي لري، محصولات یې د نړۍ په ۱۲۰ هېوادونو کې پلور ته وړاندې کېږي، په کال کې تر یو میلیارد یورو پورې عاید لري، پوما همدارنګه سپورټي یونفورم هم تولیدوي، په دې برخه کې د رېباک، ادیداس، او نایک تر څنګ ولاړ مشهور برنډ دی.

پوما شرکت همدارنګه د موټر ځغلونې، بوټ او کالي هم تولیدوي، په دې برخه کې مخکښ شرکت دی او د ډېرو سترو لوبو کالي همدا شرکت ورته تولیدوي. دوی په دې برخه کې د غوره نامه او کیفیت خاوندان دي.

پوما شرکت د نړۍ د نورو شرکتونو په څېر په دې باور دی چې کارکوونکو ته درناوی د کاري کیفیت او خدماتو د ښه والي ضمانت کوي. پوما کوښښ کوي چې خپلو ټولو کاروونکو ته اړینې اسانتیاوې برابرې کړي او همدارنګه دوی ته اجازه ورکوي چې کاري اتحادیې جوړې کړي او د خپلو حقوقو لپاره بحث وکړي. پوما د نړۍ په ګوټ ګوټ کې د خپلو محصولاتو د وړاندې کولو ۳۰۰ شرکتونه لري، دوی خپلواک دي او کولی شي د پوما محصولات په لوړه پیمانه د خپلې خوښ وړ له تخفیف سره وپلوري. پوما یو بل کار هم کوي له هغو شرکتونو سره چې له دوی محصولات وړي، لنډمهالی قرار داد لاسلیک کوي. په دې توګه نو که دوی په خپل کار کې ناغیړي وکړي، پوما ورسره خپل قرارداد فسخه کوي.

پوما کمپنۍ کوښښ کوي چې چاپېریال ساتنې ته ځان ژمن وښيي، خو داسې موارد ثبت شوي چې دوی په غیر مستقیمه توګه د چاپېریال په ککړتیا کې ښکېل دي. د بېلګې په توګه، په چین کې د دوی همکاره کمپنۍ یونګور ګروپ د یانګ تسه سیند د اوبو په ککړتیا کې پړه بلل شوې ده، نو د نقد ګوته پوما ته نېول کېږي. ویل کېږي چې په یاد سیند کې شیمیايي خطرناک مواد پیدا شوي وو او علت یې هم یاده کمپنۍ وه. همدا راز یاده کمپنۍ د خپلو محصولاتو له مینځلو او وچولو هم هوا ته زیانونه رسوي چې په وروستیو کې د ځينو هڅو له امله کابو شوي دي.

پوما کمپنۍ د نړۍ په ګوټ ګوټ کې د سپورټي سیالیو ستر مالي ملاتړ کوونکی شرکت دی. دغه کمپنۍ په ځانګړې توګه په آلمان کې د ډېریو ټیمونو مالي ملاتړ کوي. پوما اوس هم فعاله کمپنۍ ده، سلګونه کسان کار ورسره کوي او د سپورټي محصولاتو په برخه کې تر ټولو د باور وړ کمپنۍ او ازمایل شوی برنډ دی. په وروستیو کې کوښښ کوي چې له نوې ټکنالوژۍ په استفادې بوټ بازار ته وړاندې کړي.

عامل مدیر یې بورن ګولدن او د مدیره هیت مشري یې یوخن زایتس کوي.