بامیکا د لوړو زدهکړو موسسه چې په بامیان ولایت کې موقعیت لري، په ۱۳۹۲ لمریز کال کې د دوو پوهنځیو (حقوقو او سیاسي علومو او اقتصاد) په درلودلو سره تاسیس شوه او تر دې دمه په همدې دوو پوهنځیو کې درسي چارې پر مخ بیایي. د بامیکا د لوړو زدهکړو موسسې د علمي مرستیال مهرمندي نوروزي په وینا، تمه لري چې په نږدې راتلونکي کې د تضمین کیفیت او ورته نورو پروسو په بشپړولو او مراحلو په طی کولو سره به په یاده موسسه کې څو نور پوهنځي هم رامنځته کړي.
د ښاغلي نوروزي په وینا، بامیکا د لوړو زدهکړو موسسه د دوو پوهنځیو او څلورو ډيپارتمنتونو په درلودلو سره فعالیت کوي، چې حقوقو او سیاسي علومو پوهنځی یې د قضا او څارنوالۍ او نړیوالو اړیکو ډیپارتمنتونه او اقتصاد پوهنځی یې هم د ملي اقتصاد او ادارې او تجارت ډیپارتمنتونه لري. د نوموړي په وینا، اوسمهال دوی د اقتصاد پوهنځي په اداره او تجارت ډیپارتمنت کې محصلین لري، خو په ملي اقتصاد ډيپارتمنت کې تر دې دمه محصلین نه لري او درسي چارې یې نه دي پیل شوې.
ښاغلي نوروزي زیاته کړه، دوی په ټوله کې شاوخوا ۸۵۰ تنه محصلین لري چې د بامیکا د لوړو زدهکړو موسسې په دوو پوهنځيو او دریو فعالو ډيپارتمنتونو کې پر لوړو زدهکړو بوخت دي.
د بامیکا د لوړو زدهکړو موسسې یاد مسوول زیاته کړه، دوی تر دې دمه په دریو دورو کې محصلین فارغ کړي، چې د هرې دورې شمېر یې نظر یو بل ته توپیر کوي، داسې چې په لومړۍ دوره کې یې له ۱۰۰ تر ۱۲۰ تنو پورې، په دویمه دوره کې یې شاوخوا ۸۰ تنه او په همدې ترتیب یې په درېیمه دوره کې هم له۱۰۰ تر ۱۵۰ یا ۲۰۰ تنو پورې محصلین فارغ کړي او ټولنې ته یې د خدمت په موخه وړاندې کړي دي.
د ښاغلي نوروزي په وینا، بامیکا د لوړو زده کړو موسسې ته د نوو محصلینو د جذب لړۍ هم هر کال توپير کوي. داسې چې په مخکنیو کلونو کې د نوو محصلینو د جذب کچه لوړه وه، خو اوس اوس د محصلینو شرایطو او ګڼ شمېر نورو لاملونو ته په کتو یې شمېر یو څه کم شوی چې یاده موسسه هر کال له ۶۰ څخه تر ۹۰ تنو پورې نوي محصلین جذبوي او د لوړو زدهکړو شرایط ورته برابروي.
ښاغلي نوروزي وویل، دوی د محصلینو مالي او اقتصادي حالت ته په کتو، هغه محصلینو ته تر ۳۰ فیصده پورې تخفیف ورکوي، چې له مالي ستونزو سره مخ وي او یا د بشپړ فیس د ورکړې توان نه لري.
د بامیکا د لوړو زدهکړو موسسې علمي معاون ښاغلي مهرمندي نوروزي همدا راز وویل، دوی د ورځې په دوو درسي ټایمونو کې درسي چارې پر مخ بیایي چې یوه یې سهارنۍ دوره ده چې د سهار له اتو تر یوولسو بجو پورې وي او بله یې ماښامنۍ دوره ده چې له څلورو بجو پیل او د ماښام تر اوو بجو دوام کوي.
ښاغلي نوروزي زیاته کړه، دوی د خپلو محصلینو لپاره کتابتون هم لري چې شاوخوا اووه زره ټوکه کتابونه پکې دي او محصلین کولای شي د خپلې اړتیا وړ مالومات ترې ترلاسه کړي. نوموړي همدا راز وویل، پر یاد کتابتون سربېره، دوی د خپلو محصلینو لپاره د سافټ کاپي یا برېښنایي کتابونو اسانتیا هم برابره کړې چې تر لس زره پورې کتابونه پکې شته او محصلین ترې وخت نا وخت د مطالعې لپاره ګټه اخلي.
د ښاغلي نوروزي په خبره، بامیکا د لوړو زدهکړو موسسه په هېواد کې د ننه او له هېواده د باندې له یو شمېر پوهنتونونو سره علمي او اکاډمیکې اړیکې لري چې له دې ډلې یې په هېواد کې د ننه په خپله د بامیانو ولایت له دولتي پوهنتون او یو شمېر نورو خصوصي پوهنتونونو سره اړیکې لري او له هېواده د باندې د هند هېواد له یو پوهنتون سره متقابلې او علمي اړیکې لري چې وخت ناوخت ورسره د علمي او څېړنیزو چارو په برخه کې تجربې شریکوي او د اړتیا وړ لارښوونې ترې ترلاسه کوي.
ښاغلي مهرمند نوروزي زیاته کړه، دا چې د لوړو زدهکړو وزارت له لایحې او مقننې سره سم باید د لوړو زدهکړو خصوصي موسسې او پوهنتونونه د تضمین کیفیت پروسه بشپړه کړي، څو رسمي ډيپلومونه ترلاسه کړي، نو له همدې امله بامیکا د لوړو زدهکړو موسسې هم تر دې دمه یاده پروسه نه ده بشپړه کړې، نو ځکه خپلو فارغو محصلینو ته یوازې په لوړو زدهکړو وزارت کې ثبت او راجستر شوي سرټیفکېټونه ورکوي.
د ښاغلي نوروزي په خبره، دوی د محصلینو د علمي سویې د لوړولو په موخه ګڼ شمېر اسانتیاوې لري چې له دې ډلې یې مجهز کتابتون، مجهز انټرنېټ کلپ، ادېتوریم، مجرب استادان، د مطالعې لپاره لوی سالون، د مسلکي مهارتونو د ودې مرکز، د ژبې د ودې او پراختیا مرکز او ګڼ شمېر علمي سمینارونه او ورکشاپونه یې د یادونې وړ دي.
ښاغلي نوروزي زیاته کړه، دوی د موسسې د لا بډاینې لپاره ځينې ځانګړي پلانونه لري چې له هغې ډلې یې د اړتیا وړ او اړینو پوهنځیو رامنځته کول، له اړتیا سره سم او د تحصیلي رشتو اړوند نويو کدرونو ګومارل، د تیوري درسونو تر څنګ په عملي ډګر کې د کار کولو اسانتیاوو او مضمونونو رامنځته کول، په حقوقي برخه کې د عملي ستاژ برخې لپاره د لا ډېرو امکاناتو برابرول او په کاري باراز کې له اړتیا سره سم د مضمونونو او عملي درسونو لپاره د اسانتیاوو برابرول یې د یادونې وړ دي.
د بامیکا د لوړو زدهکړو موسسې علمي معاون ښاغلي مهرمندي نوروزي په پای کې وویل، دوی له دولت او په ځانګړې توګه له لوړو زدهکړو وزارت څخه ځینې غوښتنې لري او خپلې ځینې ستونزې ورسره شریکوي، د نوموړي په وینا، لوړو زدهکړو وزارت له خصوصي پوهنتونونو څخه د پام وړ ملاتړ نه کوي، په ځینو برخو کې یې پر یادو موسسو فشارونه راوړي، د تضمین کیفیت پروسې مرحلې یې پېچلې کړې، که څه هم ځینې خصوصي پوهنتونونه یو لړ نیمګړتیاوې لري، خو لوړو زدهکړو وزارت ورته د پوهنځیو د رامنځته کولو شرایط سخت کړي، یادو موسسو او پوهنتونونو ته مادي امکانات؛ لکه دولتي ځمکې او داسې نور په پام کې نه دي نیول شوي او په ټوله کې په خپله د لوړو زدهکړو وزارت کارکوونکي ځینې وخت له سلیقوي چلند څخه کار اخلي چې د نوموړي په وینا، په دې برخو کې باید لا ډېره پاملرنه وشي او لا ډېرې اسانتیاوې برابرې شي.