اهل بیت د لوړو زده کړو موسسه چې په کابل ښار کې موقعیت لري، په ۱۳۹۲ کال کې یې پر فعالیت پیل وکړ. د اهل بیت د لوړو زده کړو موسسې د رییس ښاغلي سید حبیب الله طاهري په وینا، دوی د پیل پر مهال دوه پوهنځي حقوق او سیاسي علوم او شرعیات درلودل، خو له څه مودې وروسته یې له لوړو زده کړو وزارت څخه د قابلګۍ پوهنځي جواز هم تر لاسه کړ، چې اوسمهال د دریو پوهنځیو په چوکاټ کې خپلې درسي چارې پر مخ وړي.
ښاغلي طاهري وویل، دوی ټول شاوخوا ۶۰۰ محصلین لري چې په دې ډله کې یې تر ۴۰ سلنې پورې ښځینه محصلینې دي او پاتې نور یې نارینه محصلین جوړوي، چې د اهل بیت د لوړو زده کړو موسسې په دریو بېلو پوهنځیو کې پر لوړو زده کړو بوخت دي.
ښاغلي سید حبیب طاهري زیاته کړه، دوی تر دې دمه د اهل بیت له لوړو زده کړو موسسې څخه په څلورو دورو کې تر ۴۰۰ پورې محصلین فارغ او ټولنې ته یې د خدمت په موخه وړاندې کړي دي.
د اهل بیت د لوړو زده کړو موسسې رییس همدا راز وویل، دوی هر کال له ۱۰۰ تر ۱۵۰ پورې نوي محصلین جذبوي او د لوړو زده کړو اسانتیاوې ورته برابروي.
د ښاغلي طاهري په خبره، دوی په ټوله کې د ښځینه محصلینو لپاره په خپل سمیستروار فیس کې تر شل سلنې پورې تخفیف وړاندې کوي.
ښاغلي سید حبیب طاهري همدا راز زیاته کړه چې دوی د اهل بیت د لوړو زده کړو په موسسه کې په دوو درسي ټایمونو کې خپل محصلین د زده کړو لپاره را غواړي، چې یوه یې سهارنۍ دوره ده چې د سهار له اتو د غرمې تر دوولسو دوام کوي او بله یې ماښامنۍ دوره ده چې د ماذیګر له څلور نیمو د ماخوستن تر اته نیمو بجو پورې دوام کوي.
د ښاغلي طاهري په خبره، دوی د اهل بیت د لوړو زده کړو په موسسه کې مجهز کتابتون لري، چې تر ۳۰۰۰ جلده پورې مختلف تخصصي او مهم کتابونه پکې دي او محصلین کولای شي وخت ناوخت ورته مراجعه وکړي او خپل د اړتیا وړ مالومات ترې تر لاسه کړي.
ښاغلی حبیب الله طاهري زیاتوي چې دوی په هېواد کې د ننه او له هېواده د باندې له ډېرو خصوصي او دولتي پوهنتونونو سره نېکې اکاډمیکې اړیکې لري، چې پر بنسټ یې یو له بل سره علمي تجربې او لاسته راوړنې شریکوي او همدا راز له هېواده د باندې بهرنیو پوهنتونونو ته خپل محصلین د لوړو زده کړو لپاره استوي.
ښاغلي طاهري په خپلو خبرو کې وویل، دوی د اهل بیت د لوړو زده کړو په موسسه کې تر ډېره حده د ماسټرۍ او دکتورا تر کچې د لوړو زده کړو لرونکي استادان لري، چې تر ۳۰ سلنې یې ښځینه استادانې او پاتې نور یې نارینه استادان تشکیلوي.
ښاغلي حبیب الله طاهري همدا راز وویل چې دوی تر دې دمه خپلو ټولو فارغ شوو محصلینو ته په لوړو زده کړو وزارت کې ثبت او راجستر شوي اسناد ورکړي دي، څو یې له حقوقو او امتیازاتو ګټه واخلي.
د ښاغلي طاهري په وینا، دوی د محصلینو د علمي سویې د لوړاوي په موخه ځینې امکانات لکه مجهز کتابتون، لابراتوار، د موسسې لپاره خصوصي ودانۍ، مجرب استادان او داسې نور لري.
ښاغلی طاهري وايي چې دوی د موسسې د پرمختګ او بډاینې لپاره ځينې پلانونه له ځان سره لري چې تمه ده په نږدې راتلونکي کې به عملي شي. د نوموړي په خبره، د نورو پوهنځیو زیاتول، د پوهنتون کچې ته د موسسې ارتقاع، د موسسې لپاره نوې او لویه ودانۍ هغه پروګرامونه دي چې دوی یې په راتلونکي کې د عملي کولو هوډ لري.
ښاغلي حبیب الله طاهري په خپلو خبرو کې وویل، دوی له دولت او په ځانګړې توګه له لوړو زده کړو وزارت څخه ځينې غوښتنې لري. د نوموړي په وینا، په نورو هېوادونو کې د علمي مرکزونو برېښنا هېڅ لګښت نه لري او دولت ترې پيسې نه اخلي، خو په افغانستان کې نه یوازې دا چې د برېښنا لګښت باید تحویل کړل شي، پر دې سربېره مالیات لوړ دي، خصوصي علمي مرکزونو ته اړتیا پوره کوونکې اسانتیاوې نشته، همدارنګه د هېوادوالو فقر او غریبي د دې لامل شوې څو ډېری ځوانان له لوړو زده کړو څخه بې برخې پاتې شي، د نوموړي په خبره، د یادو ډېری ستونزو حللاره له دولت او لوړو زده کړو وزارت سره ده چې باید په یاده برخه کې لا ډېرې اسانتیاوې رامنځته کړي، د لوړو زده کړو خصوصي موسسو ته لا ډېره پاملرنه وکړي او د ستونزو د حل په برخه کې یې لاسنیوی وکړي.