ښځه نیمگړې نه ده، بلکې داسې بشپړ موجود دی چې د نسلونو پالنه، روزنه او بدلون په کې نغښتی دی.
نن سبا له هېښوونکې پېښې سره مخ یم، گومان کوم د نړۍ ځینو ښځو په خپل ژوند او دنده کې د بریا او خوښۍ راز موندلی دی. له نېکه مرغه د دغو ښځو شمېر ورځ تر بلې مخ په زیاتېدو دی. داسې ښکاري لکه په دوی کې چې کوم پټ ځواک پروت وي. په اصل کې دوی یو جادویي راز موندلی دی. پوهېږی راز څه دی؟ دوی مثبت فکر کوي، د یو بل ملاتړ کوي او باور لري چې خپلو هیلو او غوښتنو ته رسېدلی شي. په همدې توگه تاسو هم کولی شئ.
له رښتیا به نه تېرېږو؛ دنده، مدیریت او د کاري ژوند سمون ستونزمن دي. ان ډېرې ښې او بریالۍ ښځې هم په لومړیو کې، په یوه دنده کې تر گومارنې وروسته نه دي بریالۍ شوې، که څه هم بریا ته د رسېدلو هره لاره یې تجربه کړې، زیارونه یې گاللي او سختۍ یې پر ځان منلې، خو هېڅ لازمه پایله یې نه ده تر لاسه کړې؛ مگر کله یې چې خپل لیدلوری او ذهنیت بدل کړی، هره ستونزه حل او د لارې خنډونه لرې شوي دي.
تاسو به هغه وخت بریالۍ شی کله چې پر خپلو وړتیاوو باور ولرئ، منفي فکرونه مو له ذهنه پاک کړئ او ټولو هغو شيانو ته په لوړ غږ (نه!!) ووایئ چې موخو ته د رسېدو په لار کې درته خنډ جوړوي. ډاډه یم، که تاسو ځانونه د مثبتو، پیاوړو او هوډمنو ښځو په کتار کې و انگېرئ، نو بریا به مو په خپله ځان ته در بللې وي. کله چې ښځې په رښتینولۍ سره د یو بل ملاتړ کوي، بېځایه خبرې شاته پرېږدي او د یو بل تر څنگ درېږي، نو یوه بېسارې او ژوندۍ پدیده رامنځ ته کېږي.
که د ځان لوړ ښودلو او بې ځایه ستاینې تېرې شو، خپلې نیمگړتیاوې ومنو او د بشپړولو لپاره یې هڅې وکړو، بیا به مو هم یوه بله بېسارې پدیده رامنځ ته کړې وي. په همدې توگه کله چې موږ د خپلو لاسته راوړنو او ماتو په اړه په رښتینولۍ سره غږېږو، نو د پیاوړتیا پر لور یو گام وړاندې اېږدو.
دا چې ځینې ښځې د ژوند په چارو کې ځانونه کمزورې گڼي، لامل یې په ذهن کې د یوه منفي الگو ټاکل دي؛ دوی په ځان کې د پټ ځواک موندلو لپاره مینې، ملاتړ او لارښوونې ته اړتیا لري. د همدې لپاره هره ښځه باید د داسې نورو ښځو په لټه کې شي، چې خپلې هیلې یې څارلې وي، پر خپلو مټو یې ځانونو ته ښه ژوند جوړ کړی وي او په هماغو لوړو بوټانو یې د موخو پر لور کلک گامونه اېښي وي.
له بده مرغه، دا کار دومره هم اسانه نه دی.
دا چې ولې ښځې پر ځانغوښتنې او حسادت مشهورې دي، کوم راز نه دی، ما په خپله هم دا شان ډېرې ښځې لیدلې دي او که رښتیا راباندې وایئ، زه په خپله یو وخت له دې ډلې یوه وم. زه داسې نجلۍ وم چې ټوله ورځ به مې غیبت کاوه او غیبت به راپسې کېده. پوهېږئ؟ دواړه حالتونه ډېر دردوونکي دي.
ولې باید ښځې تل د یو بل د حسادت، بېځایه سیالۍ او منفي لیدلوري قرباني شي؟ ولې موږ ښځې دا لیدلوری نه منو چې که د تخریب پر ځای د یو بل ملاتړ وکړو، ژوند به لا زړه راښکونکی شي؟ د دې پوښتنو پر ځواب زه هم نه پوهېږم، خو یو څه ښه راته مالوم دي، هغه دا چې د سکې پر بلې خوا ژوند ډېر ښکلی دی.
مینه وال کولای شي یاد کتاب پر اکسوس سربېره، د ښار له نورو لوی کتابپلورنځیو هم په مناسب قېمت تر لاسه کړي.