امریکا؛ له قطر څخه د ۴۰۰ ملیون ډالرو الوتکې ډالۍ ومنله

د امریکا د دفاع وزارت اعلان کړی چې د ډونالډ ټرمپ ادارې په رسمي توګه د قطر حکومت لخوا ډالۍ شوې یوه لوکس بوینګ ۷۴۷ الوتکه منلې او پلان لري چې له ترمیم وروسته یې د ولسمشرۍ د نوې الوتکې (ایر فورس ون) په توګه وکاروي. دغه الوتکه، چې ارزښت یې شاوخوا ۴۰۰ میلیونه ډالره اټکل شوی، د قطر د شاهي کورنۍ له خوا ډالۍ شوې ده. د امریکا دننه یو شمېر سیاستوال او شنونکي اندېښنه لري چې د بهرني هېواد له خوا د داسې قیمتي ډالۍ منل ممکن د اساسي قانون د “امولومنتس کلاز” سرغړونه وي، چې د بهرنیو ډالیو منل د کانګرس له تصویب پرته منع کوي. خو ولسمشر ټرمپ دا الوتکه د امریکا د هوایي ځواک لپاره یوه ډالۍ بللې او ویلي یې دي چې دا به د مالیه ورکوونکو لپاره د لګښتونو د کمښت لامل شي.