پر اوکراین د روسیې تازه بریدونه؛ ۱۰کسان وژل شوي او لسګونه ټپیان دي

د راپورونو له مخې روسي ځواکونو د اوکراین سوېل ختیځ ښار دنیپرو باندې د بې‌پیلوټه الوتکو او توغندیو پرله‌پسې سخت بریدونه کړي، چې له امله یې ټولټال لس کسان وژل شوي او لسګونه نور ټپیان دي. دنیپرو ښار د شپې او ورځې په اوږدو کې له درې جلا بریدونو سره مخ شوی دی. د سیمې والي اولېکساندر هانژا ویلي، یوازې په ښار کې اته کسان وژل شوي او ۴۹ نور ټپیان دي. نوموړي زیاته کړې چې دا ښار د روسیې پر وړاندې د څه باندې څلورو کلونو جګړې په ترڅ کې څو ځله په نښه شوی دی.