پاکستان: ایران سره خبرو کې د پام وړ پرمختګ شوی

د پاکستان د کورنیو چارو وزیر محسن نقوي، چې د دغه هېواد د پوځ له مشر عاصم منیر سره ایران ته تللی و، د ایران ولسمشر مسعود پزشکیان سره لیدنه «ډېره مثبته او رغنده» بللې او له ایران سره په خبرو کې یې د پام وړ پرمختګ خبر ورکړی دی. د پاکستان پوځ په یوه خبرپاڼه کې ویلي، د عاصم منیر او ایراني چارواکو خبرې د هرمز تنګي د بېرته پرانیستلو او د شخړې د پای ته رسولو د بهیر پر چټکتیا متمرکزې وې. محسن نقوي ویلي، په لیدنو کې د اسلام‌اباد د تفاهم‌لیک د بیا فعالولو لپاره د دواړو لورو پر اړینو اقداماتو خبرې شوې دي. نوموړي هیله څرګنده کړې چې د خبرو دغه بهیر به په سیمه کې د لا ډېرو پرمختګونو او د دوامدارې سولې لپاره زمینه برابره کړي.