د هېواد محرومو سیمو کې د اوبو رسولو پروژو پر پلي کولو ټینګار شوی

د کلیو، بیارغونې او پراختیا وزیر عبداللطیف منصور په مشرۍ د یو شمېر همکارو موسسو له استازو سره د اوبو رسولو او روغتیا ساتنې په اړه د همغږۍ ناسته ترسره شوې ده. د یاد وزارت د معلوماتو له مخې، په دې ناسته کې منصور ټینګار کړی چې په محرومو سیمو کې دې د اوبو رسولو پروژو ته لومړیتوب ورکړل شي. نوموړي ویلي، پراختیايي پروژې باید د خلکو د اړتیاوو او لومړیتوبونو له مخې پلې شي او د همکارو موسسو ترمنځ دې د چارو د ښه تنظیم لپاره لا ډېره همغږي رامنځته شي.