په امریکا کې په کرونا ویروس د اخته کسانو شمېر تر پنځه وېشت میلیونه واوښت. د امریکا حکومت په تازه څرګندونو کې ویلي چې کرونا لا هم په دغه هېواد کې د پراختیا په حال کې ده او اوس پکې د اخته کسانو شمېر تر پنځه ويشت میلیونه هم اوښتی دی. دغه راز په دې هېواد کې تر څلور سوه زره ډېر امریکايي وګړي د کرونا وبا له امله مړه شوي دي. بلخوا د بایډن ادارې بیا ویلي چې د ټرمپ حکومت د کرونا په مخنیوي او د واکسین د وېش په برخه کې هېڅ راز تګلاره نه لرله. د بایډن حکومت ویلي چې د واکسینو د وېش بهیر به چټک شي او د ولسمشر په لومړیو سلو کاري ورځو کې به سل میلیونه امریکایانو ته واکسین ورکړل شي.
