د پاکستاني رسنیو د راپورونو له مخې، تازه شمېرې ښیي چې په تېرو ۲۴ ساعتونو کې په پاکستان کې پر کرونا وبا اخته ۸۴ کسانو خپل ژوند بایللی دی. د پاکستان روغتیایي چارواکو ویلي چې په همدې موده کې ۳۴۹۰ تنه نور پر کرونا وبا اخته شوي هم دي. له دې سره پر یاد ویروس د اخته کسانو شمېر شپږ لکه او ۸۲ زره او ۸۸۸ ته او د مړه شویو هغه بیا ۱۴ زره او ۶ سوه ۹۷ ته لوړ شوی دی. د ویلو ده چې د یو شمېر نورو هېوادونو تر څنګ په پاکستان کې هم د کرونا وبا درېیمه څپه خوره شوې او روغتیایي چارواکو پر پاکستاني وګړو غږ کړی دی چې د دغه ویروس مخنیوي لپاره باید روغتیایي سپارښتنو ته جدي پاملرنه وکړي.
