پمپیو: پر ایران باید د وسلو د پلور بندیز وغځول شي

د امریکا د بهرنیو چارو وزیر مایک پمپیو ویلي، پر ایران د تهاجمي وسلو د پلورلو بندیز باید نور هم اوږد شي. د (۲۲۳۱) قطعنامې د یوه بند پر اساس په ۲۰۱۶ کال کې د پنځو کلونو لپاره ایران د تهاجمي وسلو له پېرلو څخه منع شوی دی. د قطعنامې ددغه بند موده د روان کال په اکټوبر میاشت کې پای ته رسېږي او له هغه وروسته ایران کولای شي له بهرنیو هېوادونو څخه وسلې وپېري. څو ورځې وړاندې ایران یوه نظامي ماهواره په بریالیتوب و ازمویله چې دې کار د امریکا غوسه را پارولې ده او له ملګرو ملتونو یې غوښتي چې په دغه هېواد باندې د وسلو د نه پېرلو لګېدلی بندیز نور هم اوږد کړي. مایک پمپیو ایران په سیمه کې ترهګرۍ ته په لمن وهلو تورن کړی او ویلي یې دي چې ایران له ګڼ شمېر تروریستي ډلو ملاتړ کوي او په منځني ختیځ کې کړکېچ ته لمن وي.