د اروپایي ټولنې د پولو ساتنې اداره وايي، اروپا ته د ورتلونکو ناقانونه کډوالو په شمېر کې د پام وړ زياتوالی راغلی دی. وارسا کې مېشتې د اروپايي ټولنې د پولو ساتنې ادارې يا فرونتیکس ويلي چې د روان کال په لومړیو څلورو میاشتو کې یې د ۵۷ زره او اته سوه ناقانونه کډوالو دوسیې ثبت کړې دي چې دا د تېرکال د همدې مودې په پرتله په سلو کې ۶۹ زیاتوالی ښیي. دې ادارې ویلي چې په اوکراین کې د جګړې له امله کډوال شوي خلک په دغو شمېرو کې نه دي شامل. فرونتیکس ویلي، له ۲۷ زره زیات کسان د لویدیځ بالکان له لارې اروپایي ټولنې ته داخل شوي چې دا د تېر کال په همدې موده کې له دې لارې د اروپایي ټولنې غړیو هېوادونو ته د اوښتو ناقانونه کډوالو ۱۳۰ سلنه زیاتوالی ښیي. د دې ادارې په وینا اکثره ناقانونه کډوال د افغانستان او سوریې دي. ناقانونه کډوال له لویدیځ بالکان پرته د ختیځې مدیترانې او ترکیې له لارې هم یونان او قبرس ته ځانونه رسوي.
