د چین نړیوالې راډیو د خبر له مخې د چين صدراعظم لي که چيانګ تېره شپه د واکسين په نړيواله ويډيويي سرمشريزه غونډه کې پر دې ټينګار کړی چې چين د کرونا وبا د واکسين، درملو او څارنې علمي څېړنه چټکه کړې او په دې برخه کې نړيوالو همکاريو ته ډېر اهميت ورکوي. هغه ویلي، چې په چين کې د ټولو چينايانو د هڅو له امله د کرونا د خپرېدو مخنيوی شوی، خو مبارزه ختمه شوې نه ده. ده ویلي، چې د بېلا بېلو هېوادونو خلک د روغتيا برخې سره نږدې اړيکې لري، چين به په پر له پسې ډول له زياينمنو شويو هېوادونو په تېره بيا پرمختيايي هېوادونو سره مرستې وکړي، څو په دغو هېوادونو کې اقتصادي او ټولنيزې چارې بيا عادي شي. چيانګ ویلي، چې چين به په پر له پسې ډول د واکسين ازموينې په ګډون د روغتيا نړيوال سازمان د لارښوونکي رول ملاتړ وکړي او د واکسين د ژر تر ژره استفادې لپاره به کوښښ وکړي.
