امريکا په عراق کې د ايران وروستي هوايي بريدونه غندلي

امريکا د عراق په کردمېشتو سيمو کې د ايران وروستي هوايي بريدونه غندلي دي. ايران له تېرې يوې اونۍ راهيسې د عراقي کردستان په چومن او شيتکان سيمو کې هوايي او د بالسټيک توغنديو بريدونه کوي څو کردي فعالين ايران کې د پيل شويو اعتراضونو له ملاتړه په شا کړي. د امريکا د بهرنيو چارو وزارت ويلي چې ايران په عراقي کردستان کې پر بريدونو سره د عراق ځمکنۍ بشپړتيا او حاکميت تر پښو لاندې کړې دی. سرچينې ويلي په بريدونو کې ملکي وګړو ته هم مرګ ژوبله اوښتې خو شمېرې يې نه دي يادې کړې.  د ايران دا بريدونه هغه هېواد کې د پراخو لاريونونو او اعتراضونو تر پيل کېدو وروسته پيل شوې او لا هم روان دي. ياد اعتراضونه تر هغې وروسته پيل شول چې تهران کې د اخلاقي امنيت پوليسو يوه کردۍ پېغله د بې حجابۍ له کبله تر شکنجې وروسته ووژله.