د اوکراین ولسمشر ولادیمیر زلینسکي د امریکا له وروستیو څو میلیارد ډالري مرستو څخه چې د براډلي زغره وال موټرونه هم پکې شامل دي، ستاینه کړې ده. نوموړي ویلي دا دقیقا هغه څه دي چې له روسي ځواکونو سره په جګړه کې د اوکرایني ځواکونو پکار دي. د اوکراین ولسمشر دا یوه ډیره پیاوړې بسته بللې ده. زلینسکي په داسې حال کې د امریکا د نظامي مرستو ستاینه کوي چې سپینې ماڼۍ د جمعې په ورځ له اوکراین او د ناټو د ختیځې اروپا له غړو هیوادونو سره د ۳.۷۵ میلیاردو ډالرو په ارزښت د وسلو او نورو مرستو اعلان وکړ. زلینسکي له بایډن، امریکایي قانون جوړونکو او ټولو امریکایانو څخه چې د آزادۍ ملاتړي دي او په دې پوهیږي آزادي ددې ارزښت لري چې وساتل شي، مننه کړې ده. د امریکا د نظامي مرستو وروستۍ بسته، تر اوسه له کیف سره د واشنګټن د مرستو تر ټولو ستره بسته ده.
اوکراین د امریکا د تازه نظامي مرستو ستاینه کړې ده
