تر چمن او تورخم وروسته نن غلام خان بندر هم پرانیستل شو

پاکستان نن غلام خان بندر هم د افغان سوداګرو پر مخ پرانیستی دی. د پاکستان د بهرنیو چارو وزارت وایي چې تېره ورځ یې تورخم او چمن لارې پرانیستې او نن یې غلام خان لاره هم پرانیستې ده او سلګونه موټرونه به پر دغه لار تګ راتګ کوي. تر ډېره پر دغه لار هم سوداګریز کاروانونه ځي راځي چې له افغانستان تازه میوې او نور توکي پاکستان ته وړي او له هغه لوري ساختماني، خوراکي او نور اړتیا وړ توکي پر دې لار واردېږي. غلام خان بندر لار په دې وروستیو کې فعاله شوې ده او له افغانستان سره د پاکستان د نورو سوداګریزو لارو په پرتله لنډه او غوره ګڼل کېږي.