امریکا: روسیه ښایي ایران ته جنګي جیټ الوتکې ورکړي

سپینې ماڼۍ ویلي امریکا په دې باور ده چې روسيه ايران ته د خپلو جنګي الوتکو د لېږلو په اړه غور کوي او دا اقدام د دواړو هېوادونو د پوځي همکاريو د پراختيا يوه برخه ده. د سپینې ماڼۍ د ملي امنیت سلاکار جان کربي د یوې اعلامیې په خپرولو سره ویلي، دوی باور لري چې روسیه ښایي له ایران سره د توغندیو، الکترونیکي وسایلو او هوايي دفاع په ګډون بې ساري دفاعي همکارۍ وکړي. کربي زیاته کړې چې ایران د لویدیځو هېوادونو د بندیزونو له امله سخت منزوي شوی دی. د امریکا د ملي امنیت سلاکار ویلي چې ایران روسیې ته د پوځي مهماتو د استولو په بدل کې د خپل پوځي ځواک د پیاوړي کولو هڅه کوي. امریکايي چارواکو په وار وار ویلي چې روسیه له ایران څخه ترلاسه شوې وسلې او مهمات د اوکراین په جګړه کې کاروي. کربي زیاته کړه، چې ایران له روسیې څخه د نورو پوځي تجهیزاتو د اخیستلو په لټه کې دی، چې په کې بریدګرې هلیکوپټرې، رادارونه او جنګي روزنیزې الوتکې هم شاملې دي.