د ایران لپاره د امریکا ځانګړی استازی برایان هوک بحرین ته تللی و او ددغه هېواد له چارواکو سره یې پر بېلو مسایلو خبرې کړې دي. دغه دواړو هېوادونو ټینګار کړی چې د ایران د تهاجمي سیاست پر وړاندې به درېږي او په ګډه به یې د ورانکاره فعالیتونو مخه نیسي. امریکا بیا ویلي چې ایران لا هم په سیمه کې د ترهګرۍ ملاتړی دی او ښه به وی چې ددغه هېواد د لا ورانکارۍ مخه ونیول شي. دوی دغه راز ټینګار کړی چې د ملګرو ملتونو امنیت شورا باید پر ایران د بندیزونو دوام ته هم رایه ورکړي او دغه هېواد باید د ترهګرو د ملاتړ له امله تر فشار لاندې وي.
