د کوټې په کندهاري بازار سیمه کې د پولیسو پر یو موټر په بمي برید کې څلور تنه وژل شوي او ۱۵ نور ټپیان شوي دي. سیمه ییز چارواکي وايي، د پېښې ډېری قربانیان ملکيان دي. د بلوچستان د ایالتي حکومت ویاند بابر یوسفزی وايي، په مړو کې ۲ پولیس او ۲ ملکي وګړي شامل دي. د پولیسو په وینا، په دې برید کې د پولیسو د تحقیقاتو د برخې د یوه چارواکي موټر په نښه شوی. د دې برید پړه د بلوڅانو د ازادۍ پوځ په نوم وسله والو منلې ده.
