سپینه ماڼۍ: ټرمپ اوس په افغانستان کې د روسیې له کړنو خبر شوی

سپینه ماڼۍ وایي د امریکا ولسمشر ډونالډ ټرمپ اوس په افغانستان کې د روسیې له اقداماتو خبر شوی دی. فرانسي خبري اژانس د سپینې ماڼۍ د یوې ویاندې کایلي مک‌اناني له قوله ویلي، ټرمپ اوس د نیویارک ټایمز د هغې ادعا په اړه خبر شوی دی چې ویلي یې وو، روسیې په افغانستان کې د امریکایي سرتېرو د وژنې پر سر طالبانو ته انعام ورکاوه. نوموړې زیاته کړې، ټرمپ له څېړنو او ارزونو وروسته په دې اړه اطلاع ترلاسه کړې ده خو په وینا یې تر اوسه نشي ویلی چې دا معلومات څومره باوري دي. که څه هم وړاندې تر دې سپینې ماڼۍ ویلي وو چې ټرمپ سره له دې چې ورځني راپورونه په دقیق ډول ګوري د یادې ادعا په اړه خبر نلري خو امریکایي رسنیو بیا ویلي چې ټرمپ یا ورځني راپورونه ګوري نه او یا هم ورته لوستل کېږي.