روسیه: امریکا د سیاسي اختلافاتو له امله پر روسیې تورونه لګوي

د روسیې د بهرنیو چارو وزیر د امریکا د هغو راپورونو په وړاندې عکس العمل ښودلی چې وايي، روسانو په افغانستان کې د امریکايي پوځیانو د وژلو لپاره طالبانو ته انعامونه ټاکلي وو. د انټرفاکس خبري آژانس د راپور له مخې، د روسیې د بهرنیو چارو وزیر سرګي لاوروف ویلي، چې پر روسیې طالبانو ته د پیسو ورکولو تورونه د امریکایانو ترمنځ د خپل منځي سیاسي ناندریو له کبله لګول کیږي. لاوروف دا خبرې وروسته له دې وکړې چې د امریکا کانګرس جګپوړي دفاعي چارواکي احضار کړل چې د دغو تورونو په اړه ځواب ووايي. د امریکا د دفاع وزارت چارواکو وویل، که د امریکا پوځ هغه راپورونه تایید شول چې روسیې په افغانستان کې د امریکايي پوځیانو د وژلو لپاره طالبانو ته پیسې ورکړي، متحد ایالتونه به يې ځواب ووايي.