د اسراییلو بې پیلوټه الوتکې د لبنان رمیش سرحدي سيمې ته څېرمه د ملګرو ملتونو پر څارونکو برید کړی. رویټرز خبري اژانس د دوو امنیتي سرچینو له قوله ویلي، چې اسراییلي برید د رمیش له سرحدي ښارګوټي بهر د ملګرو ملتونو د څارونکو پر یوه موټر ترسره شوی دی چې د دغه برید له امله څو تنه ټپيان شوي دي. د لبنان رسمي خبري آژانس هم ويلي چې د ملګرو ملتونو د څارونکو يوه ډله پرون د اسراییلو د هوايي بريد ښکار شوې چې له امله يې ۴ تنه ټپيان شوي چې د يو تن حالت يې نازک دی. د اسراییلو پوځ بيا د لبنان په رميش سيمه کې د ملګرو ملتونو د څاورنکو افرادو په نښه کول رد کړي دي.
