د روسيې په هوايي برید کې ۱۸ اوکرایني وګړي وژل شوي

د اوکراین په اودیسه ښار کې د هستوګنې پر يوه سیمه توغندی لګیدلی چې د دوو ماشومانو په ګډون ۱۸ کسان پکې وژل شوي دي. چارواکي وايي دغه توغندی د تورې بحیرې له استقامته توغول شوی چې شاوخوا ۳۰ نور کسان پکې ټپيان شوي هم دي. اوکرايني چارواکي وايي چې سهار وختي د بندری ښار، اوديسه کې د هستوګنې پر یو ساختمان د روسي ځواکونو په توغندویز برید کې لږ تر لږه ۱۸ کسان وژل شوي دي. په وژل شوو کسانو کې دوه ماشومان هم شامل دي. دغه پيښه داسې وخت رامنځ ته کیږي چې تر دې يوه ورځ مخکې روسېې د تورې بحیرې له يوه ستراتيژيک ټاپو څخه خپل ځواکونه وایستل. د اوکراین د ولسمشرۍ دفتر مرستیال، کریل تیموشینکو، هم ويلي دي چې په دغې توغندویزه حمله کې د دوو ماشومانو په ګډون ۱۸ کسان وژل شوي دي.