د ۱۹ کلنو اسیا جام؛ افغان لوبډله سبا له هند سره سیالي کوي

د اسیا ۱۹ کلنو جام سیالیو په لړ کې د افغانستان د ۱۹ کلنو کم عمره کرکټ ملي لوبډله، سبا ورځ ۱۰ بجې د هندوستان لوبډلې پر وړاندې سیالي ترسره کوي. د کرکټ بورډ د مالوماتو له مخې افغان لوبډله په یادو سیالیو کې د ګډون په موخه د ډیسمبر میاشتې په ۶ مه نېټه اماراتو ته رسېدلې او نن ورځ یې خپل تمرینات هم ترسره کړي دي. د یادولو وړ ده، افغان لوبډله د ۱۹ کلنو اسیا جام سیالیو په الف ګروپ ده او خپلې نورې دوه لوبې به د ډیسمبر په ۱۰مه نېټه له نیپال او د ډسمبر په ۱۲مه نېټه به بله لوبه له پاکستانۍ لوبډلې سره ترسره کړي.