کاناډا تر اوږده ځنډ وروسته سعودي ته خپل سفیر بېرته لېږلی دی

کاناډا او سعودي عربستان له پنځو کلونو وروسته په خپل منځ کې ډیپلوماتیکې اړیکې بیا پیل کړې. سعودي عربستان په ۲۰۱۸ م کال وروسته له دې چې د کاناډا د بهرنیو چارو وزارت په یوه ټویټ کې په سعودي کې د ښځو د حقونو د نیول شویو فعالانو ملاتړ څرګند کړ، د کاناډا سفیر له ریاضه وایست او په کاناډا کې یې خپلې شتمنۍ وپلورلې. د دواړو هېوادونو د باندنیو چارو وزارتونو پرون چهارشنبې په یوه اعلامیه کې وویل چې یو بل ته به نوي سفیران استوي او دا پرېکړه د اسیا پسفیک د اقتصادي همکارۍ سازمان د غونډې په څنډه کې د سعودي عربستان د ولیعهد محمدبن سلمان او د کاناډا د صدراعظم جاستین ترودو ترمنځ د نومبر د میاشتې په غونډه کې شوې وه. کاناډا جان فلیپ لینتو په ریاض کې د خپل هېواد نوی سفیر نومولی دی.