د امريکا د بهرنيو چارو وزارت د اګست په ۲۰مه نېټه په يوې اعلاميې کې ويلي، چې پر قطر به د ۴ ميليارډو او ۵۰۰ ميليونو امريکايي ډالرو په ارزښت پوځي تجهيزات او وسلې وپلوري او دغه پلان ته يې منظوري ورکړې ده، چې پکې د ټانکرونو الوتکې او نور تجهيزاتو هم شامل دي.
په اعلاميه کې ويل شوي، چې دغه پلان به د امريکا له ستراتيژيک سيمه ييز ملګري سره د امنيتي وړتياوو په لوړولو کې مرسته وکړي او د امريکا د بهرنۍ پاليسۍ او ملي امنيت موخې به پوره کړي. د دې ترڅنګ، دا به د قطر دفاعي توان او له امريکايي او متحدينو ځواکونو سره د هغوی عملياتي همغږي هم پياوړې کړي او هم به په سيمه ييز امنيت کې د قطر ستراتيژيک رول وساتي.
