د ني جو سيند لويه دره د چين د يون نان ولايت د چو جينګ ښار په پوو لي کلي کې موقعيت لري.
د روان کال د جولای په ۳۱مې نېټې په یادې درې کې د فو یاو په نوم دوهم نمبر لېفټ، چې ۲۸۸ متره جګوالی لري، ګټې اخيستنې ته وسپارل شو. د دغه لېفټ ترڅنګ د چينګ يون په نوم لومړی نمبر لېفټ هم شته، چې ۲۶۸ متره اوږدوالی لري او په ۲۰۲۲م کال کې جوړ شوی دی.
هغه ماشومان، چې په يادې درې کې اوسېږي، پخوا به د غره د پاڼونو او لوړو ژورو له لارې ښوونځي ته تلل او څه باندې ۳ ساعته مزل به يې کاوه، خو اوس یې دغه مزل د دواړو لېفټونو او د څوکې د پاسه غځېدلي ټيلفېر په وسیله ۳۰ دقيقو ته کم شوی دی.
د يادولو ده، د سیمې زده کوونکي او هم خلک دواړه لېفټونه په وړيا توګه کاروي او د ننوتنې ځانګړې لارې ورته برابرې شوې دي.
د ايران خبري رسنيو د همدغو لېفټونو په اړه راپورونه ورکړي او د اساسي تاسيساتو په اړه يې ځيني ارقام خپاره کړي دي. خو دلته بايد د يادو خبرونو د حيرانتيا وړ ارقامو په پرتله لا ارزښتناکو مالوماتو ته پاملرنه وشي.
حقيقت دا دی، چې په اقتصادي لحاظ د دغو لېفټونو د جوړولو ګټې له لګښتونو سره برابرې نه دي.
د دغو دوو لېفټونو د جوړولو بيه لوړه ده او د همدې درې د يوه کلي يوازې څو لسګونه کورنۍ او زده کوونکي ترې ګټه اخلي. لګښت او ګټو ته په کتو، هيڅ سوداګريز ارګان به حاضر نه شي، چې په داسې سیمې کې دغه ډول پانګونه وکړي.
ټولنيز خدمتونه له سوداګرۍ سره توپير لري او د خلکو ګټې په پام کې نيول کېږي. د دغو لېفټونو په رڼا کې ښوونځي ته د ماشومانو د تګ وخت ۳ ساعتونه کم شوی؛ عمرخوړلي او کمزوري کسان نور اړتيا نه لري، چې د درنو بارونو په شا کولو د د غره د څوکې او لمنې ترمنځ غځېدلې سخته لاره ووهي او دغه کلی اوس له جغرافيايي پرېکون څخه لرې شوی او له نورو سيمو سره نښلول شوی دی.
دغسې چارې باید په پيسو حساب نه شي او نه باید په اقتصادي ګټو پسې تړاو ولري او يوازې د خلکو ژوند باید په نظر کې ونيول شي.
دغه چاره د هغه منطق څرګندويي کوي، چې رښتينې ګټې له پيسو نه مخکې دي.
په حقيقت کې د چين پرېکړې او پلانونه ګټور دي او په کوردننه د بېوزلۍ د له منځه وړلو او د کليو د سمسورتيا په چارو کې یې تطبیقوي او په ټوله کې يې پلانونه پر لرې پرته سيمو او کمزورو برخو متمرکز دي.
په چين کې ورته بېلګې نورې هم موندلی شو
د شي ځانګ کورواکې سيمې د الي سيمې په يوه کلي کې يوازې څو کورنۍ اوسېږي ، خو د اوبو او برېښنا بشپړې شبکې ورته جوړې شوې دي.
د سه چوان ولايت د ليانګ شان د يي قوم کورواکې ولسوالۍ په شوان يا کلي کې د غره په لوړو ژورو کې داسې پولادي زينه جوړه شوې، چې ۲۵۵۶ اړکي لري.
د ني جو سيند په درې کې جوړ شوي لېفټونه هم ښې بېلګې کېدای شي.
د چين په دغو پرېکړو کې د اقتصادي ګټو په پرتله د خلکو ګټو ته لومړیتوب ورکړل شوی دی.
برسېره پر دې، دغه سيسټم د ځايي سيمو د پرمختيايي توان د لوړولو لپاره هم ځانګړی رول لري.
دغه لېفټونه په داسې حال کې جوړ شوي، چې د ني جو سيند په درې کې د څلور اې په کچه د سيلانيزې سيمې د پرمختګ چارې روانې دي.
د نوموړي سيند دپاسه بېپانجيانګ پل غځيدلی، چې جګوالی يې په نړۍ کې تر ټولو لوړ دی.
دغه پل د دې سيمې يوه سيلانيزه نښه ګرځيدلې او ډېر سيلانيان يې لیدنې ته ورځي او ورسره د کليوالو هوټلونو او رسټورانټونو چارې هم سمسورې شوي او د ځايي ځانګړو محصولاتو د خرڅلاو وضعيت ورسره ښه شوی دی.
يادو لېفټونو نه يوازې د کليوالو لپاره ټرانسپورټي اسانتياوې برابرې کړي، بلکې دوی ته يې له بازار څخه د ګټې د اخيستلو امکانات هم برابر کړي دي.
دا د دې ښه بېلګه بللی شو، چې د اساسي تاسيساتو ابادي ځايي سيمو ته د پرمختګ خوځنده قوت ورکولی شي.
تر ۲۰۲۶م کال پورې، د نوموړې سيلانيزې سيمې په شاوخاو کې له ۲۰۰ زيات رسټورانټونه، هوټلونه او د ځانګړو محصولاتونو دکانونه جوړ شوي دي. دغو لېفټونو نه يوازې د دغه کلي ټرانسپورټي ستونزه حل کړې، بلکې ځايي خلکو ته یې ډېر ګټور فرصتونه هم برابر کړي دي.
ځينو بهرنيو رسنيو د دغو لېفټونو جوړونه د عجيب کار په توګه ياده کړې، خو دغه پېژندنه یې دقيقه او بشپړه نه ده. ځکه، «عجیبه» کليمه عموماً هغو تصادفي پېښو او چارو ته کارول کېږي، چې هغه کاپي یا نه تکرار کېدونکې وي.
د ني جو سيند په درې کې د جوړو شويو لېفټونو پروژه د چين د جنوب لوېديځ په غرنيزو سيمو کې يوازېنې بېلګه نه ده، بلکې د چين په ډېرو سیمو کې ورته سخت کارونه تر سترګو کېږي.
د دغو پروژو بنسټيز منطق دا دی؛ هغه سيمې، چې سرمايه يې کمه او عادي لارې چارې یې فعالې نه وي، په ځانګړو اقداماتو خنډونه او جغرافيايي پرېکون له منځه وړلی او پرمختګ کولی شي.
