د چين – افريقا د همکاريو فورم سږنۍ غونډې ته د ګوتو په شمېر ورځې پاتې دي. دوې لسيږي کيږي چې چين او افريقا د مخکې تګ لپاره د يوه ميکانيزم په توګه ياد فورم رامنځته کړی دی. دغه فورم تر دې مهاله د دواړو لورو تر منځ د اړيکو د دوام په برخه کې مهم رول لوبولی او د نړيوالو ګډوډيو، ویش او ماتو په ترڅ کې یې د مشارکت د مهمې وسيلې موقف ټينګ کړی دی. په لنډيز سره که ووايو د چين – افريقا د همکاريو فورم هم د چين – افريقا د مشارکت د مسير ښودونکې وسيلې او هم د يوې څرګندې نقشې په توګه عمل کوي چې له رامنځته کېدو راهيسې یې د پام وړ متقابلې ګټې او پايلې لرلې دي.
رسمي ارقام ښيي چې چين له تېرو پنځلسو کلونو راهيسې په پرله پسې توګه د افريقا تر ټولو ستر سوداګریز شريک دی چې د دوه اړخیزې سوداګرۍ کچه یې ۲۸۲.۱ ميلياردو امريکايي ډالرو ته رسيږي، په داسې حال کې چې په ۲۰۲۳م کال کې په افريقا کې د چين د مستقيمې پانګونې کچه ۴۰ ميلياردو امریکايي ډالرو ته رسېده. له همدې کبله تمه کيږي چې د چين – افريقا د همکاريو فورم سږنۍ سرمشريزه به له شک پرته رامنځته شوی تحرک لا پسې پياوړی کړي، دوه اړخيزې ګټې به ډيرې کړي او د ګډ برخليک لپاره به د دواړو اړيکې لا پسې ټينګې شي.
که څه هم سږنۍ سرمشريزه په يوه داسې حساس وخت کې جوړيږي چې جغرافيوي کشمکشونه په ډيريدو او د اقليمي بدلون مسئله په جدي کېدو روانه ده. دغه مغلقې ننګونې د افريقا په شمول پر پرمختيايي هېوادونو د فشار د ډيريدو سبب کيږي او په پایله کې یې د نړيوال ارزښتي ځنځير اکمالاتي اړخ اغېزمن کيږي.
پر دې اساس، د چين د دولت د رييس شي جين پينګ له لوري وړانديز شوي درې پلانونه يا نوښتونه يا د افريقا د صنعتي کېدو د ملاتړ نوښت، د افريقا د کرنې د عصري کولو د ملاتړ لپاره د چين پلان او د استعدادونو د ودې لپاره د چين – افريقا د همکاريو پلان به د افريقا د جوړښتي ستونزو په هواري کې د پام وړ رول ولوبوي. دغه راز له راتلونکې سرمشريزې تمه کيږي چې د پورته يادو پلانونو په ښه پليتابه کې مهم رول ولوبوي. د نوښتونو له ډلې يو دا دی چې د افريقا له توليدي سکټور سره مرسته وشي څو اقتصاد متنوع کړي. له همدې کبله د چين په څېر هېوادونو ملاتړ چې په افريقا کې ډيرې پانګونې، مالي ملاتړ او مرستو ته ژمن دي خورا حياتي ارزښت لري.
همدې ته ورته، په افريقا کې د کرنې سکټور د ودې په موخه په ياده لويه وچه کې د کرنې په برخه کې پانګونې ته د چيني کمپنيو هڅونه د افريقا د کرنې سکټور د عصري کولو لپاره د چين د ملاتړ د پلان موخه ده.
درېيم پلان د استعدادونو د ودې دی. ياد پلان به افريقا ته د دې فرصت برابر کړي چې د خپلو وګړو د شمېر له ډيروالي ګټه واخلي او د خپلې اقتصادي ودې لپاره د ټکنالوژۍ اغیزناکه تبادله اسانه کړي.
د چين – افريقا د همکاريو فورم د مختلفو هېوادونو د دولتي چارواکو په را غونډولو سره دا زمينه هم برابرولی شي چې د خلکو تر منځ په مختلفو برخو او سکټورونو کې د تبادلاتو مسير پوخ شي. ياد فورم د نړۍ د رهبريتي سيسټم په تړاو مهم وړاندیزونه هم کولی شي او په ځانګړي ډول د مخ پر ودې هېوادونه غږ او غوښتنې د نړۍ د حکومتولۍ په سيسټم کې شاملولی شي.
