د چين د دولت رئيس شي جين پينګ د مې له ۷مې نېټې څخه تر ۱۰مې نېټې پورې له روسيې څخه رسمي ليدنه کړې او د پخواني شوروي اتحاد لخوا د وطن د دفاع جګړې د برياليتوب ۸۰مې کليزې د يادونې په مراسمو کې يې ګډون کړی دی.
د چين د بهرنیو چارو وزير وانګ يي د ياد سفر د پای ته رسېدو په درشل رسنيو ته د دې سفر اړوند معلومات ورکړي.
وانګ يي ويلي، چې دغه سفر د دولت رئيس په توګه روسيې ته د شي جين پينګ ۱۱م رسمي سفر دی، دغه راز له لس کلن ځنډ وروسته يې يوځل بيا د پخواني شوروي اتحاد لخوا د وطن د دفاع جګړې د برياليتوب د يادونې مراسمو کې ګډون کړی.
د هغه په خبره، شي جين پينګ د دې سفر په ترڅ کې په څه باندې ۲۰ دوه اړخيزو فعاليتونو کې ګډون کړی، له روسي لوري سره يې په بېلابېلو برخو کې د دواړو هېوادونو د همکاريزو پلانونو په اړه خبرې اترې کړې، د فاشيزم ضد نړيوالې جګړې د برياليتوب د ۸۰مې کليزې په اړه يې بحثونه کړي او په ګډه يې د نړيوال مساوات او عدالت د خوندي ساتنې لپاره هڅه کړې.
وانګ يي وويل، نړیوالو رسنيو ياد سفر ته ډېره پاملرنه کړې او په دې اړه يې ډېر خبرونه او راپورونه خپاره کړي دي.
نوموړي دغه راز ویلي چې د اکثريت نړيوالو رسنيو په نظر، د شي جين پينګ ياد سفر مهم ارزښت لري، چې د چين او روسيې ترمنځ د نوې زمانې هراړخيزې ستراتيژيکې همکاريزې اړيکې يې لا ټينګې کړې، له دوهم نړیوال جنګ وروسته د نړيوال نظم د خوندي ساتنې لپاره يې لارښوونه کړې او د نړۍ څو قطبي کېدو او د نړيوال سياسي وضعيت بيا جوړېدو شعار ته يې قوت وربښلی دی.
