د چين کلتوري صنعت ۲۱م نړیوال نندارتون د مې په ۲۲مې نېټې د ګوانګ دونګ ولايت په شن جن ښار کې پرانيستل شو او ۵ ورځې به دوام ولري.
په دغه نندارتون کې په لومړي ځل د مصنوعي ځيرکتيا نندارځی جوړ شوی، چې په ټوله کې د نندارې او سوداګرۍ لپاره ځانګړی شوی دی او د نړیوال کېدو، بازاري کېدو، مسلکي کېدو او ډيجيټلي کېدو د سويې د لوړولو لپاره هڅې کوي. دغه نندارتون د کلتوري صنعت په برخه کې د چين لومړی لوی نندارتون دی او په اړوندو نړيوالو نندارتونونو کې د مخکښ ځای د نيولو په هڅه کې دی.
دغه نندارتون د ۳ مجموعي نندارځايونو او ۵ مسلکي نندارځايونو په شمول ۸ نندارځي لري، چې په دې ۳ مجموعي نندارځايونو کې د کلتوري صنعت دوې برخې او د لوی خليج سيمې يا د ګوانګ دونګ ولايت، هانکانګ او مکاو ځانګړو سيمو د کلتوري صنعت ابتکاري نندارځی شامل دي او پاتې په ۵ مسلکي نندارځايونو کې د نړيوالې کلتوري سوداګرۍ نندارځی، د کلتوري مصرف او سيلانيزو چارو نندارځی، د هنري ډيزاين، فيشني ژوند او کلتوري تخنيکونو او سوداګرۍ نندارځی، د فلم او ټېلويزيون، د چاپ حق، برېښنايي لوبو نندارځی او د غير مادي ميراثونو او هنرونو نندارځی شامل دي.
ټاکل شوې په دغه نندارتون کې به له ۱۲۰ زرو ډېر کلتوري تولیدات نندارې ته وړاندې او د کلتوري صنایعو د پانګو اچولو او راجلبولو څه باندې ۴ زره پروژې ترسره شي. د معلوماتو له مخې، په دغه نندارتون کې به ۶ زره او ۲۸۰ حکومتي پلاوي، کلتوري سازمانونه او شرکتونه په انلاين او افلاين ډول ګډون ولري، چې دغه شمېر د تېرې دورې د نندارتون د ورته شمېر په پرتله ۲۶۵ زيات دی.
د يادونې ده، چې په دغه نندارتون کې په لومړي ځل د مصنوعي ځيرکتيا د نندارې ځانګړې سيمه جوړه شوې او شاوخوا ۶۰ شرکتونو پکې خپل تولیدات نندارې او پلور ته وړاندې کړې دي.
د چين د کلتوري صنعت د ۲۱م نړیوال نندارتون انتظامي کمېټې د دفتر مشرې ليو لېي رسنيو ته ويلي، دغه نندارتون د کلتور او تخنيک پيوستون ته پاملرنه کوي، د مصنوعي ځيرکتیا په شمول د پرمختللو تخنيکونو له لارې د دغه نندارتون توان پياوړی کوي او د سوداګرۍ رول يې نور هم ټينګوي. د هغې په خبره، دغه نندارتون به د نړیوال کېدو، بازاري کېدو، مسلکي کېدو او ډيحيټلي کېدو سويه پر له پسې لوړه کړي او د کلتوري توليداتو د معاملې، د پانګونې او د نويو تخنيکونو د نندارې په برخو کې به د ډګر ښه رول ولوبوي.
د معلوماتو له مخې، په دغه نندارتون کې ۶۵ هېوادونه او سيمې او ۳۰۵ بهرني شرکتونه په انلاين او افلاين ډول ګډون لري، چې شمېر يې په ټولو ګډونوالو کې ۲۰ سلنه نيولی دی او په دې جمله کې د ۴۰ هېوادونو او سيمو ۱۳۲ بهرني شرکتونه افلاين يا حضوري او د ۲۵ هېوادونو او سيمو ۱۷۳ بهرني شرکتونه بیا انلاين برخه لري.
وړاندوينه کېږي، چې په دغه نندارتون کې به د ۱۱۰ هېوادونو او سیمو ۳۵ زره بهرني مسلکي نندارچيان برخه واخلي، چې په دوی کې به ۱۲ زره افلاين او ۲۳ زره انلاين ګډون ولري.
دا د کلتوري صنعت د سوداګرۍ ملي، نړیوال او مجموعي نندارتون دی، چې د نړیوالې ټولنې لخوا تائيد شوی او د چين تر ټولو لوړ، لوی او اغېزمن نندارتون بلل کېږي.
دغه نندارتون د چين د کلتور د ورخلاصون يوه مهمه کړکۍ يادېږي.
