د چين او جنوبي اسيا د ۲۰۲۰ ز کال انلاين نندارتون د ډسبمر په ۱۲مه پرانيستل شو، چې نوم يې (( د چين او جنوبي اسيا تلپاتې نندارتون)) دی. د کرونا وبا د اغېزو پر وړاندې په نوموړي نندارتون کې ګډون ته د ګڼ شمېر تصديو او سوداګرو شوق نه دی کم شوی. دغه نندارتون د دوی د اړتياوو د پوره کولو لپاره په لومړي ځل په انلاين ډول جوړ شوی. که څه هم دغه نندارتون په انلاين نندارتون بدل شوی، خو د ګډونوالو شمېر يې د تېرو دورو په پرتله کم شوی نه دی چې دغه وضعيت له چين سره د تجارتي تګ راتګ په اړه د افغانستان په شمول د جنوبي اسيا د اتو هېوادونو اعتماد لا ټينګ کړی او د خوځنده ځواک لپاره يې ماحول برابر کړی دی.
چين د نړۍ تر نورو هېوادونو لومړی د کرونا وبا وضعيت کنترول کړی او اقتصادي مثبت پرمختګ يې رامنځته کړی دی. له جنورۍ څخه تر نومبر پورې د چين د وارداتو او صادراتو عمومي ارزښت ۲۹۰۴۰ ميليارده يوانه دی او د زياتوالي انډول يې يو اعشاريه اته دی چې د امريکايي ډالرو په معادل د وارداتو او صادراتو ارزښت يې ۴۱۷۰ ميليارده امريکايي ډالره دی او د زياتوالي انډول يې صفر اعشاريه شپږ سلنه دی. دا د کرونا وبا له خپرېدو وروسته لومړی ځل دی چې د چين د وارداتوا و صادراتو ارزښت زياتوالی رامنځته شوی. د دې ترڅنګ چين د کرونا وبا د وقايې او کنټرول په نړيوالو همکاريو کې رېښتيني اقدامات ترسره کړي چې تر خپلې وسې پورې تر دوو سوو زياتو هېوادونو او سيمو ته يې وقايوي مواد صادر کړي او د انسانانو د روغتيا او طبي چارو ګډې ټولنې د ابادۍ لپاره يې په دې توګه د پام وړ هڅې کړې دي. برسېره پر دې، په چين کې د توليدي چارو نظام په چټکۍ سره اعاده شوی چې چين د دغو کوښښونو له لارې د کرونا وبا په موده کې د بېلابېلو هېوادونو د خلکو د ژوند او کار اړتياوې پوره کړې او د نړيوال صنعتي ځنځير د ثابت دوران لپاره يې مثبت رول لوبولی دی. چين د وارداتو د زياتوالي لپاره فعال ګامونه پورته کړي چې له امله يې د نړۍ د وارداتو په عمومي اندازه کې د چين ونډه صفر اعشاريه اته سلنه زياته شوې ده، دا د نړيوال اقتصادي او سوداګريزې همکارۍ د فعاليت لپاره د چين بل مهم خدمت دی.
په ياد حالت کې پرانيستل شوی د چين او جنوبي اسيا انلاين نندارتون د بېلابېلو هېوادونو پاملرنه راجلب کړې. د معلوماتو له مخې، د جنوبي اسيا د ۸ هېوادونو او د جنوب ختيځې اسيا ۱۰ هېوادونو په شمول د څه باندې ۹۰ هېوادونو ۹۳۰۰ تصدۍ په دغه نندارتون کې ګډون لري. ډېر خوشاله يم چې د ګډونوالو په لېست کې مې د څو افغان تصديو نومونه هم ليدلي او سوداګريزې چارې يې د زعفرانو، غاليو او لاسي صنعت په شمول له زياتو صنعتونو سره تړاو لري. افغانستان د چين نږدې ګاونډی هېواد دی او د دواړو هېوادونو ترمنځ د اقتصادي او سوداګريز تګ راتګ پټ قوت لوی دی. لومړی، د چين د اقتصادي او ټولنيز پرمختګ ښه تمايل څرګند دی. چين د نړۍ دویم لوی اقتصاد دی او د منځني عايد لرونکو کسانو شمېر يې د نړۍ تر ټولو هېوادونو زيات دی. چين به د کورني دوران په محور د کورني او بهرني دواړو دورانونو د متقابل تحريک په بڼه د پرمختګ نوی شکل جوړ کړي. دویم، چين او افغانسان د صنعتي چارو په برخه کې يو بل بشپړولی شي. له يوې خوا، د چين په بازار کې د افغانستان د ښه کيفيت کرنيزو او حيواني توليداتو ته زياتې اړتياوې شتون لري. له بلې خوا، په چين کې افغان سوداګر هر کال د افغان بازارونو د اړتياوو د پوره کولو لپاره له چين څخه ګڼ شمېر د ښه کيفيت او ټيټې بيې ورځني اړتيا توکي او صنعتي توليدات اخلي. درېيم، افغانستان د منځنۍ اسيا او د ختيځې اسيا وصل ځمکنی پل بلل کېږي او دغه مهم مقام يې د يو کمربند او يوې لارې پېشنهاد په چوکاټ کې لا څرګند او ارزښتناک دی. د افغانستان توليدات د چين او افغانستان ترمنځ د هوايي دهلېز او ځانګړو باروړونکو اورګاډيو له لارې چين ته ليږدول شوي چې افغان بزګرانو او مالدارانو ترې ډېرې ګټې اخيستې دي.
د چين او جنوبي اسيا انلاين نندارتون د چين او افغانستان ترمنځ د سوداګريزو همکاريو لپاره يوه نوې کړکۍ پرانيستې ده. د کرونا وبا په وړاندې، نړۍ او د سيمې بېلا بېل هېوادونه بايد خپلمنځي همکارۍ پياوړې کړي او په ګډه دې ستونزې ليرې کړي. نوموړی نندارتون به د چين د يون نان ولايت د جغرافيايي وړتيا او د ديجټلي تکنالوژۍ د پرمختګ په رڼا کې د دغه هېواد او د جنوبي آسيا او جنوب ختيځې آسيا د هېوادونو ترمنځ د اقتصادي او سوداګريزو همکاريو لپاره مناسب نوی خوځنده ځواک برابر کړی دی. نندارتون تلپاتې دی او سيمه ييزې همکارۍ تل پاتې دي! زه د چين او افغانستان ترمنځ د سوداګريزې همکارۍ د ښې راتلونکې په اړه پوره باور لرم!
