اسیا پراختیایي بانک په یو تازه راپور کې ویلي چې په دې وروستیو کې افغانستان بهرنیو هېوادونو ته د پاکستان په پرتله د ایران له لارې ډېره سوداګري کړې ده. په راپور کې راغلي، افغانستان په وروستیو کلونو کې خپل ۷۰ سلنه سوداګریز توکي د ایران له لارې بهرنیو هېوادونو ته صادر کړي دي. راپور د پاکستاني حکومت له لوري د افغان سوداګرو پر وړاندې خنډونو ته په اشارې ویلي، چې پاکستان په دې کار سره خپل ځان تاواني کړی دی ځکه ډېری سوداګرو بدیله لار موندلې او اوس د ایران له لارې چې د پاکستان په پرتله ارزانه او اسانه ده خپلې سوداګرۍ ته دوام ورکوي. د یادونې ده چې پاکستان د کرونا ویروس پراختیا مخنیوي په بهانه خپلې ټولې لارې د افغان سوداګرو پر مخ تړلې وې خو د پاکستاني سوداګرو تر ډېرو فشارونو وروسته یې بلاخره څه موده وړاندې بېرته پرانیستې.
- Trending
- Comments
- ورستی
