ایران: افغان غالیو او فرشونو له موږ نړیوال بازار نیولی دی

ایران وایي په افغانستان کې جوړو شوو غالیو په نړیوالو بازارونو کې د ایراني غالیو ځای نیولی دی. د ایران د صنعتي سکتور چارواکو او د غالیو د پلور اتحادیې مسوولینو ویلي دي چې دمګړی په نړیوالو بازارونو کې د ایراني غالیو او فرشونو پر ځای د افغانستان، هند او پاکستان غالیو او فرشونو بازار خپل کړی دی. ددوی په خبره دا ایران ته ستره اقتصادي ضربه ده او ایراني غالۍ په نړیوالو بازارونو کې هېڅ مشتري نه لري. ایراني چارواکو یې د مشتریانو د کمېدو لامل هم د بیو لوړوالی ښودلی دی، خو په حقیقت کې افغان غالۍ په ټوله نړۍ کې تر ټولو ګرانبیه دي. د افغانستان په لاس اوبدل شوي فرشونه هم په نړیواله کچه ګرم بازار لري او خلک یې خوښوي. ایراني چارواکو ویلي چې دمګړی یې په نړیواله کچه مشتریان پنځه اتیا سلنه کم شوي دي. ایران همدا راز وایي چې خلک د بیو د ټيټوالي په خاطر پاکستاني او هندي فرشونه هم خوښوي.