ناټو: له افغان پوځ سره اوږه په اوږه د ګواښونو پر وړاندې مبارزه کوو

ناټو وایي دوی له افغان پوځ او افغان حکومت خپل ملاتړ ته ادامه ورکوي. په افغانستان کې د ناټو ملکي استازي سټیفانو پانتیکورو له ولسمشر غني سره لیدلي دي او پر بېلو مسایلو یې خبرې کړې دي. د ارګ له مطبوعاتي دفتره په خپره شوې اعلامیه کې راغلي، د ناټو ملکي استازي په دې لیدنه کې ټینګار کړی چې له افغان حکومت او افغان پوځ به د ناټو ملاتړ دوام لري او د ناټو سرتېري به له افغان پوځ سره اوږه په اوږه د ګواښونو پر وړاندې مبارزه کوي. سټیفانو همدا راز ټینګار کړی چې ناټو د افغانستان د سولې په مسئله کې هم له هېڅ راز همکارۍ ځان نه سپموي. ولسمشر غني هم د ناټو له مرستو مننه کړې ده او په وینا یې په افغانستان کې د نړیوالې ترهګرۍ پر وړاندې مبارزه روانه ده او نړیوال باید په دې برخه کې له افغان حکومت سره خپلو همکاریو ته ادامه ورکړي.