د دفاع وزارت سرپرست اسدالله خالد وایي چې افغان ځواکونه کولی شي په یوازې ځان له خپل هېواده په کلکه دفاع وکړي. نوموړي نن د ملي اردو یوې غونډې ته په خبرو کې زیاته کړې، ناپوه افغانان د نورو په اشاره جګړې کوي خو افغان ځواکونه یې په کلکه پر وړاندې دفاع کولو ته چمتوالی لري او چاته به اجازه ورنکړي چې د هېواد ملي ارزښتونه له منځه یوسي. هغه زیاته کړې، افغان ځواکونه پیاوړي دي او د بهرنیانو له ملاتړ پرته کولی شي د خپل هېواد دفاع وکړي. نوموړی دا څرګندونې وروسته تر هغه کوي چې امریکا ویلي دوی په افغانستان کې د خپلو ځواکونو شمېر تر ټولو کمې کچې ته رسولی دی.
