د چين د کمونېست ګوند د مرکزي کمېټې او دولتي شورا له لوري د يکشنبې په ورځ د اقتصادي او ټولنيزې پراختيا په ټولو اړخونو کې د زرغونې انرژۍ د بدلون د چټکولو لپاره د لارښودونو يوه ټولګه خپره شوه، دا د کاربن د کمولو او زرغونې انرژۍ د کارولو لومړنی سيستماتيک ګام دی.
د چين کمونيست ګوند له اتلسم ملي کانګريس راهيسې، چين د ايکو سيسټم او چاپېریال د خونديتابه او دغه راز د زرغونې انرژۍ د توليد په برخو کې تاريخي لاسته راوړنې درلودلې دي. د ايکولوژۍ او چاپېريال وزارت د معلوماتو پر بنسټ، د چين د کورنيو ناخالصو توليداتو د هر واحد پر سر د کاربن ډای اوکسايډ د خپرېدو کچه د ۲۰۱۲م کال په پرتله ۳۵ سلنه راټيټه شوې ده. دغه راز په چين کې د زرغونې انرژۍ توليدات هم د حرارتي انرژۍ په پرتله ډېر شوي دي.
د چين د زرغونې انرژۍ توليدات په ورته مهال له ننګونو سره هم مخ دي. د بېلګې په ډول، د دغه هېواد د انرژۍ چوکاټ لا هم د ډبرو سکرو پر بنسټ ولاړ دی. د فوسيلي انرژۍ او دوديزو صنايعو نسبت لا هم لوړ دی او د ايکولوژيکي او چاپېريالي کيفيت بنسټونه لا هم ښه پياوړي نه دي.
په بيجينګ کې مېشت د عامه او چاپېريالي چارو د انسټيټيوټ د مشر ما جون په خبره، په دغسې وضعيت کې د دولتي کچې نويو لارښودونو خپريدل اړين دي او کولی شي چې د لوړ کيفيت زرغونې انرژۍ د توليداتو له ډيرېدو او دغه راز د کاربن د خپريدو په برخه کې د چين د موخې له تر لاسه کېدو سره مرسته وکړي.
د چين د ټولنيزو علومو د اکاډمۍ د ايکو – تمدني څېړنو په انسټيټيوټ کې د اقليمي بدلون د اقتصادي مطالعاتو د دفتر مشر يو شيانګ CGTN ته ويلي چې نويو دولتي لارښودونو نه يوازې دا چې د لږ کاربن او زرغونې پراختيا لپاره د چين مخکنۍ پاليسي تازه کړې، بلکې هغو ننګونو ته یې هم په جامع ډول پاملرنه کړې ده چې چين د زرغونې پراختيا په برخه کې ورسره مخ دی. هغه زياته کړې چې نوي لارښودونه به په ټولو اقتصادي او ټولنيزو سکټورونو کې جامع زرغون بدلون چټک کړي.
پر اقتصاد د اقلیمي بدلون د اغېز په اړه د چین د څېړنیزې ادارې مشر يو شيانګ باور څرګند کړی چې د چين د مرکزي حکومت د مخکنيو لارښودونو په پرتله نوي خپاره شوي لارښودونه يو جامع او سيستماتيک ليدلوری وړاندې کوي او ټول قلمرو، صنعتي جوړښت، د انرژۍ سکټور، ترانسپورټ او د ښاري – کليوالي سيمو پراختيا تر پوښښ لاندې راولي.
نوي خپاره شوي لارښودونه به تر ۲۰۳۰م کال پورې په ټولو اقتصادي او ټولنیزو برخو کې د زرغون بدلون په برخه کې د پام وړ پايلې ولري او د لږ کاربن، زرغون او دایروي پراختيايي اقتصادي سيسټم د رامنځته کېدو سبب به شي. دغه راز به تر ۲۰۳۵م کال پورې د ښايسته چين د موخې له پلې کېدو سره مرسته وکړي او چين به د نړيوالې زرغونې ودې پر سرلاري بدل کړي.
د پايدارې پراختيا لپاره د لېکسټون انسټيټيوټ رييس او د چاپېريال لپاره د چين د مسلکي بورډ مشر هو ټاو له CGTN سره په مرکه کې ويلي، په داسې حال کې چې چين له تېرو لسيزو راهيسې د چاپېريال د خونديتابه په هڅو کې ښکېل دی، دغه هېواد د نړيوالې زرغونې حکومتولۍ د سيسټم په برخه کې هم مخکښ دی. له يوې خوا له نورو هېوادونو سره د ککړتيا د کمولو او نوې کېدونکې انرژۍ د ودې په برخو کې خپلې تجربې شريکوي، له بلې خوا د زرغونې پراختيا په برخه کې د مخکښتوب له کبله، چې د نړيوالو له لوري هم په رسميت پېژندل شوې، د نړيوالې زرغونې پراختيا لپاره د اصولو په جوړولو کې هم مخکښ رول لوبوي.
اقليمي بدلون نړيواله ننګونه ده. نوي خپاره شوي لارښودونه ښيي چې چين به د اقتصادي پراختيا او ايکولوژيکي پايدارۍ تر منځ توازن رامنځته کوي او د چاپېريال ساتنې په ټولو نړيوالو نوښتونو کې به ونډه اخلي.
