په پام کې ده، چې د چين او افريقا د ۲۰۲۴ کال همکاريز فورم سرمشريزه به د سپتمبر له ۴مې نه تر ۶مې نېټې پورې په پلازمېنې بېجينګ کې ترسره شي او د کمربند او لارې باکيفيته ګډه ابادي به يې د بحث يوه عمده موضوع وي.
د يادې سرمشريزې مطبوعاتي مرکز د سپتمبر په ۲مې نېټې رسماً فعاليت پېل کړی او اړوند مسؤل يې د دغې سرمشريزې لومړۍ خبري ناستې ته ويلي، چې چين او افريقا د کمربند او لارې د ګډې ابادۍ په برخه کې زياتې لاسته راوړنې لري او په راتلونکې کې به په لا زياتو نويو ساحو کې نږدې همکارۍ وکړي.
تر اوسه۵۲ افريقايي هېوادونو او د افريقا ليګ له چين سره د کمربند او لارې د ګډې ابادۍ يادښتونه لاسليک کړي دي. د چين د پرمختګ او اصلاحاتو ملي کمېټې د سيمه ييز ورخلاصون ادارې د مشر شو جيان پينګ په خبره، چين به له يو شمېر افريقايي هېوادونو سره د کمربند او لارې د ګډې ابادۍ نوي همکاريز پلانونه هم لاسليک کړي.
نوموړي ويلي، چين او افريقا له تېرو ۱۱ کلونو راهيسې خپلمنځي همکارۍ له فکرونو په واقعي کړنو او له هيلو په واقعيتونو بدلې کړي، د افريقايي هېوادونو اقتصادي او ټولنيز پرمختګ ته يې نوی خوځنده ځواک او نوې انرژۍ برابرې کړي او د دواړو خواوو د ګډ برخليک ټولنې د چټکې ابادۍ لپاره يې د ملا تېر جوړ کړی دی.
د شو جيان پينګ په خبره، چين به له لا زياتو افريقايي هېوادونو سره د کمربند او لارې د ګډې ابادۍ همکاريز پلانونه لاسليک کړي، د افريقا ليګ د ۲۰۶۳ کال اجنډا او د ملګرو ملتونو د ۲۰۳۰ کال پرمختيايي اجنډا سره به همکارۍ وکړي، فکري اجتماع به په واقعي لاسته راوړنو بدله کړي او د دواړو خواوو د ګډ برخليک ټولنې د ابادۍ لپاره به مهم رول ولوبوي.
شمېرې ښيي، چيني تصديو له تېرو ۱۱ کلونو راهيسې په مختلفو افريقايي هېوادونو کې شاوخوا لس زره کيلومتره رېل پلټۍ، نژدې سل زره کيلومتره سړکونه، زر پلونه، سل بندرونه، ۶۶ زره کيلومتره برېښنايي لاينونه او د ۱۵۰ زرو کيلومترو په اوږدوالي عمده مخابراتي شبکې جوړې يا ترميم کړې دي.
د غلو دانو امنيت او کرنيزو چارو د چين او افريقايي هېوادونو د همکارۍ بله عمده برخه جوړوي. اړوندې شمېرې ښيي، چې چين په افريقا کې د کرنيزې ټکنالوژۍ ۲۴ نمونوي مرکزونه جوړ کړي او له تېرو مسلسلو کلونو راهيسې چين ته د افريقا کرنيزو توکو په صادراتو کې هر کال څه دپاسه ۱۰ سلنه زياتوالی راغلی دی.
چين په ۲۰۲۳ کال کې له افريقا څخه د ۵.۳۲ ميليارډو امريکايي ډالرو په ارزښت کرنيز محصولات وارد کړي او د افريقايي کرنيزو توکو دوهم لوی وارداتي هېواد ګرځېدلی دی.
ښاغلي شو جيان پينګ په يادې خبري ناستې کې څرګنده کړې، چې چين به له افريقا سره خپلمنځي کرنيزې همکارۍ لا نورې ژورې او پراخې کړي او له افريقايي هېوادونو سره به په ګډه د کرنيزو چارو لا ښکلې راتلونکې جوړه کړي.
د دې تر څنګ، چين له ۱۷ افريقايي هېوادونو سره د اقليمي بدلون پر وړاندې همکاريز يادښتونه هم لاسليک کړي دي.
د چين کمونېست ګوند له تېرو څو کلونو راهيسې د څه باندې ۵۰ افريقايي هېوادونو له کابو ۱۲۰ سياسي ګوندونو سره نظرتبادلې او همکارۍ کړي او د چين او افريقا د کمربند او لارې د ګډې ابادۍ سياسي بنسټ يې ايښی دی.
د چين د کمونېست ګوند مرکزي کمېټې د بهرنيو اړيکو ادارې د څلورمې څانګې مشر وانګ هه مينګ خبر ورکړی، چې ادارې يې د چين او افريقا ملکي فورم، د ځوانو مشرانو فورم او ځيني نور ملکي فعاليتونه جوړ کړي او د دواړو خواوو د کمربند او لارې د ګډې ابادۍ ملکي بنسټ يې ټينګ کړی دی.
چين به په راتلونکې کې له مختلفو افريقايي هېوادونو او افريقا ليګ سره د ډيجټلي زېربناوو د ابادۍ، د ډيجټلي اقتصاد د پرمختګ، مصنوعي ځيرکتيا، طب او روغتيايي چارو په شمول لا زياتو چارو کې همکارۍ وکړي.
