باوري یم چې تر اوسه به مو ګڼې سوداګریزې خبرتیاوې اورېدلې او لیدلې وي، چې موخه یې د خپلو نوو تولیداتو او محصولاتو په اړه د خلکو خبرول دي. کېدای شي په دغو خبرتیاوو کې مو له یوې څخه اورېدلي وي چې:
«کولای شی د ځمکو او کورونو د پلورلو په برخه کې زما په څېر د زیاتو پیسو خاوندان شی او په دې برخه کې پر یو بانفوذه شخص بدل شی. بسنه کوي چې زموږ په میاشتینۍ پچه اچونه کې ګډون وکړی، خپل بخت و ازمایئ او مېلیونر شئ.»
کېدای شي داسې یو کتاب مو پېرلی وي چې په څو شېبو کې مو ژوند ته بدلون ورکړي او یا مو په داسې یو ورکشاپ کې ګډون کړی وي، چې د پانګې اچونې په برخه کې د نوو فنونو او لارو چارو په زده کولو سره مو مالي استقلال لاسته راوړی وي او د وخت له لاسه ورکولو پرته مو خپل کسب او کار ته پرمختګ ورکړی وي.
ټول ټلوېزیوني پروګرامونه او کتاب پلورنځي د شتمن کېدو او بریالي کېدو لپاره تر ټولو وروستي او لوی فرصتونه ګڼل کېږي. هره نوې نظریه تر پخوانۍ هغې د پام وړ او بریالۍ ده. دغه نظریه کېدای شي چې تقویتي ورکشاپونه، سوداګریزې خبرتیاوې او یا هم عامه پوهاوی وي، اړینه دا ده چې تګلارې یې یو له بل سره توپیر لري.
له چټک شتمن کېدو څخه ان تر بریالیتوب او خوښیو پورې ټول بدلونونه په همدې لنډمهاله ورکشاپونو، پروګرامونو او کتابونو کې راوړل شوي دي. کېدای شي تاسو خپلې بریاوې او بدلونونه د هغو داستانونو له منځه پیدا کړی، چې ستاسو له توان او اسانتیاوو سره هېڅ اړیکه نه لري.
هغه کیسې او داستانونه چې وایي د یوې اونۍ په اوږدو کې شتمن شی، په اصل کې موږ له خپلې اصلي موخې څخه لرې کوي. دا داستانونه موږ دې ته اړ باسي څو د نورو له موخو سره سم حرکت وکړو او په پای کې ستړي او ناهیلي له خپلو هڅو لاس واخلو. کله چې خپله اصلي موخه ونه پېژنی او کمزوری عمل وکړی، بیا نو د خنډونو د له منځه وړلو او له هغوی څخه د تېرېدلو توان نه لری.
په خواشینۍ سره لنډمهاله پروګرامونه، خبرتیاوې او ورکشاپونه، موږ ته دا نه وايي چې بریا ته رسېدل دومره هم ساده او اسانه نه دي. حقیقت دا دی چې د خپلو موخو د لاسته راوړلو لپاره لومړی باید له ډېرو خنډونو او ستونزو سره مخ شو. دغه فرېب ورکوونکې کیسې، لوستونکي ته دا نه وايي چې د تمې او وړاندوینې خلاف شرایط به مخې ته راځي او له ډېرو خطرونو سره به مخ کېږو او دغه وخت بیا موږ هم د دې هر څه له منلو پرته بله لاره نه لرو.
هر یو کس چې په یوه برخه کې خپلو شخصي بریاوو ته رسېدلی، تاسو ته وایي، هغه پوښتنه چې باید ځواب ورکړو، دا نه ده چې «ایا د تمې او وړاندوینې خلاف شرایط مو په مخ کې شته او که نه؟» بلکې پوښتنه دا ده چې «دغه شرایط به په کوم وخت کې مخې ته راځي او څه ډول کولای شو چې د هغوی پر وړاندې عمل وکړو؟» همدغه د شک او نا باورۍ شېبه ده چې زموږ رښتینی شخصیت را څرګندېږي.
د ډېرو لپاره د سختیو او ستونزو همغه لومړنۍ نښې نښانې بسنه کوي، څو له هڅو لاس واخلي او ناهیلي شي. خو ډېری کسان بیا د ستونزو له را ولاړېدو سره سم خپله اراده لا پیاوړې کوي او د ستونزو پر وړاندې د استقامت او درېدو لپاره نوې لارې لټوي. هغوی د دې پر ځای چې تسلیم شي، له ستونزو څخه د خپلې بریا لپاره نوي فرصتونه جوړوي، ځکه هغوی پوهېږي چې ستونزې او سختۍ تل سر را پورته کوي. هغوی پوهېږي چې ځینې موکې د ستونزو په زړه کې ځای لري او ځینې نورې بیا په اسانۍ سره د لاسته راوړو وړ دي. هغه حالت چې وکولای شو د ارامۍ احساس وکړو، په ارامه ساه وباسو، په پوره غور سره هر څه و ارزوو او هغه شرایط وټاکو چې په ښه توګه وکولای شو د ستونزو له زړه څخه مناسب فرصتونه ترلاسه کړو، همغه زموږ د بریالیتوب د حالت څرګندوی دی. په داسې یو حالت کې د ځان لپاره داسې شرایط خپلوو چې کولای شو پر هر ډول ستونزه برلاسي شو او غوښتنې مو چې هر څه وي، لاسته یې راوړو.
تېروتنه مه کوئ، له ستونزو سره د مخ کېدو پر مهال د غوره حالاتو او شرایطو خپلول اسانه کار نه دی. همدا په خپله یوه لویه ستونزه ده.
په حقیقت کې ډېری کسان پر دې باور دي چې موږ ټول انسانان د خوښۍ، شتمنۍ او بډاینې د حالاتو په اړه پوره پوهه او مالومات لرو.
خوښي خپل نظم او قانون لري.
د خوښیو د لاسته راوړلو لپاره لومړی باید داسې یو قانون او قاعده ولرو چې پر اساس یې د خوښۍ مفهوم بیان او تعبیر کړای شو. کله چې ټاکلې او روښانه موخه ولرو، اړینه ده چې د ستونزو په زړه کې د شته فرصتونو د لاسته راوړلو لپاره له یو ځانګړي نظم او قانون څخه پیروي وکړو او له لارښوونو سره سم یې پر مخ ولاړ شو. دغه قاعده او قانون هغه مهال زموږ لاسنیوی کوي، کله چې د هغه څه په لور ګام واخلو چې موږ یې خپله اساسي موخه بولو.
د دې موضوع په اړه فکر وکړئ. کله چې هر څه زموږ له خوښې سره سم پر مخ ځي، خوښ اوسېدل او غوره پرېکړه کول ډېر اسانه او ساده کار دی. پوښتنه دا ده، کله چې له یوې ستونزې یا خنډ سره مخ کېږو، څه ډول غبرګون ښکاره کړو. همدغه شېبه ده چې موږ نړۍ او کایناتو ته او له دې څخه اړینه دا چې خپل ځانته مو، ځان د یو انسان په توګه ورپېژنو. کله چې تسلیمېږو، په خپلسرې توګه له ماتې سره مخ شوي یو. که په ساده ډول یې ووایم، خپلې موخې مو لاس ته نه دي راوړې. خو کله چې یوې ستونزې یا خنډ ته په ورین تندي ښه راغلاست وایو، په اسانۍ سره کولای شو چې د هغه ستونزې یا خنډ د رامنځ ته کېدو پر لاملونو پوه شو، د ستونزو له زړه څخه اړین فرصتونه لاسته راوړو او وروسته خپل مسیر ته بدلون ورکړو.
له لنډمهاله خنډونو سره د تعامل کولو تګلاره، زموږ د کار پایلې څرګندوي.
دا په یاد ولرئ: کېدای شي چې په باغ کې مو یو بوټی کرلی وي، کېدای شي په زړه کې مو هیلې کرلې وي، کېدای شي په وجود کې مو وېره کرلې وي، خو تر هغه وخته چې دغه بوټي ته پاملرنه کوو او هغه ته اوبه او خواړه ورکوو، لا ډېرې رېښي ځغلوي او په خپل ځای کې کلک او پیاوړی کېږي. کله چې د ښېګڼو په لټه کې و اوسو، ښېګڼې به لاسته راوړو. کله چې د فرصتونو په لټه کې و اوسو، مناسب فرصتونه په خپله سر راښکاره کوي.
د بېلګې په توګه، فرض کړئ غواړی چې په سوداګریزه برخه کې کار وبار پیل کړی، له همدې امله تل د رسنیو اوازو ته غوږ یاست او په بازار کې د نرخونو د لږې اندازې ښکته او پورته کېدو سره مو پر زړه لړزه راځي. دا همغه شېبه ده چې د دې کسب په اړه خپله مینه او لېوالتیا له لاسه ورکوی او هغه موخه مو تر پوښتنې لاندې راولی، چې د اوږده وخت لپاره مو ورباندې کار کړی دی. په همدې حال کې داسې هیله من کسان هم شته چې له دې بحران او ګواښ څخه په ښه توګه ګټه اخلي او همدا ستونزې د ځان لپاره پر طلایي موکه بدلوي. هغه د دې پر ځای چې د سرو زرو یا بل هر توکي د بیې له ناڅاپي ټیټېډو څخه ناراحته او نا هیلی شي، له دې توکو څخه په زیاته کچه یې د ټیټې بیې په بدل کې اخلي او وروسته یې د بیو په لوړېدو سره د پام وړ ګټې په لاسته راوړلو پلوري.
ژباړه: حمیدالله حمیدي
