د چين حکومت په دې وروستيو کې د اقتصادي ودې تحريکوونکې تګلارې خپرې کړي او د اکتوبر په ۸مې نېټې يې د دغو تګلارو د تطبيق په اړه يوه مطبوعاتي غونډه ترسره کړې ده.
نړيوالو رسنيو په دغې غونډې کې خپرو شويو معلوماتو ته لوړه پاملرنه کړې او خوشبين خبرونه يې خپاره کړي دي. د چين دغو تګلارو د ماليې، مصرف، پانګونې، د کورونو او نورو نامنقولو جايدادو بازار او سهامي بازار په شمول زياتې برخې تر پوښښ لاندې راوستلي، د بېلا بېلو خواوو باور يې لوړ کړی او د دغه هېواد اقتصاد ته يې وده ورکړې ده.
له تېرې يوې مودې راهيسې د يادو تګلارو د تطبيق په رڼا کې د چين اقتصادي ثبات او پرمختګ ساتل شوی او د بازارونو په اړه يې اټکلونه لوړ شوي دي. د توليدي صنعت د پي اېم ایي شاخص (PMI) په شمول مهمې اقتصادي شاخصونه يې په چټکۍ پورته شوي او سهامي بازار يې بيا غوړیدلی دی.
بر سېره پر دې، د چين د ملي جشن په رخصتۍ کې د چينايانو لګښت لوړ شوی دی. شمېرې ښيي، د اکتوبر له لومړۍ نېټې څخه تر اوومې نېټې پورې په دغه هېواد کې نورو سيمو ته د خلکو د سفرونو شمېر ۲ ميليارډه او ۸ ميليونو ځلو ته رسېدلی، چې د هرې ورځې منځنی شمېر يې د تېر کال د همدې رخصتۍ په پرتله ۴،۱٪ زياتوالی ښيي او د دغه هېواد د سيلانيزو سيمو د پلورل شويو ټکټونو اندازه بیا د تېر کال د همدې رخصتۍ په پرتله ۳۷٪ زياته شوې او د پلورل شويو فلمي ټکټونو ارزښت يې له ۲ ميليارډه او ۱۰۰ ميليونو يوانو څخه اوښتی و. د هسپانيې ايفي اژانس (EFE) خبر ورکړی، چې په دغې رخصتۍ کې سلو ميليونو چينايانو بهرنيو هېوادونو ته سفرونه کړي دي.
بهرنيو رسنيو د سيلانيزو چارو ګرم بازار د چين فعال اقتصاد ښودلی او چيني سيلانيانو د بهرنيو سفرونو په لړ کې ځايي سيمو ته پرمختګ ورکړی دی.
د چين په دغې رخصتۍ کې د لګښت ځيني نوي بدلونونه ښودل شوي، يو يې د ډيجټل، زرغون رنګ او پېوستون په برخو کې زيات لګښتونه او بل يې د کورونو د اخيستلو په شمول لوی لګښتونه او پانګونې دي، چې مخ په زياتېدو دي.
بر سېره پر دې، په چين کې د حکومت د مرستندويه پاليسۍ په رڼا کې د برقي توکو د خرڅلاو اندازه د تېر کال د همدې رخصتۍ په پرتله ۶۷٪ زياته شوې ده.
چين د نړۍ دوهم لوی اقتصاد دی او دوامدار اقتصادي پرمختګ يې د نړۍ لپاره ښه زیری دی. په نړۍ کې د ځاني سوداګرۍ ساتونکې غوښتنې پياوړې شوي، د جيوپوليتيک وضعيت پېچلی شوی او د نړيوال اقتصاد د سمسورتيا ځواک کمزوری شوی دی.
د پيسو نړيوال صندوق اټکل کړی، چې سږکال به د نړۍ د اقتصادي پرمختګ انډول ۳،۲٪ وي او د تېر کال په پرتله به ټيټ وي. د چين اقتصادي ثبات او پرمختګ د نړيوال اقتصادي پرمختګ لپاره خوځنده ځواک برابر کړی او خلکو ته یې هيلې ورکړې دي. د چين بازار د ورخلاصون د پياوړتيا په حال کې دی او نورو هېوادونو ته ګډې ګټې او ګټور فرصتونه رسوي.
د چين کمونېست ګوند د شلمې مرکزي کمېټې درېيمه عمومي غونډه لږه موده دمخه ترسره شوه او د لوړې کچې د ورخلاصون ميکانيزم او سيسټم د بشپړولو په اړه يې ترتيبات نيولي او پرېکړه يې کړې، چې د ميکانيزمونو ورخلاصون به لا پراخ کړي، د بهرنۍ سوداګرۍ د سیسټم اصلاحات او د بهرنيو سوداګرو د پانګونو او په بهر کې د پانګونې د اداري سیسټم اصلاحات به پياوړي او د سيمه ييز ورخلاصون جوړښت به اصلاح کړي او د کمربند او لارې د باکيفيته ابادۍ ميکانيزم به بشپړ کړي.
د چين حکومت د اکتوبر په ۸مې نېتې اعلان کړی، چې د پانګو د راجلبولو او ثابتولو ځواک به پياوړی کړي، ورخلاصون به لا پراخ او د بهرنيو پانګو نوې پروژې به پلې کړي او له ويزې پرته چين ته د بهرنيانو د تګ نوې تګلاره به عملي کړي. چين به د د ورخلاصون کچه لا پياوړې کړي او دغه هېواد ته د خلکو د تګ لپاره به لا زياتې زمينې برابرې کړي او په کوردننه به د کارو بار د پرمختګ په برخه کې د بهرنيو تصديو لپاره زمينې برابرې کړي.
چين د پر له پسې مثبتو پيغامونو له خپرېدو او د بازاري اټکلونو له ښه کېدو سره د اقتصادي او ټولنيزو موخو پر بشپړولو پوره باور پيدا کړی او دا باور یې پر نړيوال اقتصاد د خلکو د باور لپاره هم ګټور دی.
