يوه بار وړونکې بېړۍ، چې پکې ۱۷۳۸ کنټينرونه بار وو، څو ورځې مخکې د چين له چيامن بندر څخه د جنوبي افريقا د دوربان ښار په لور وخوځيده. دغه سمندري مسير په ۲۰۱۴م کال کې پيل شوی او تراوسه بار وړونکو بېړيو پرې ۴۵۸ ځله سفرونه کړي او د ۲۹ ميليارډو او۲۰۰ ميليونو يوانو په ارزښت مالونه يې پرې لېږدولي دي.
دغه سمندري مسير د نوموړو دوو سيمو ترمنځ د مالونو ټرانسپورټي وخت ۷ ورځې کم کړی او د برېکس هېوادونو ترمنځ د همکاريو يوه ښه بېلګه بلل کيږي.
د برېکس همکاريز ميکانيزم پر جوړېدو ۱۸ کلونه اوښتي او ډېرې ورته بېلګې لري.
د برېکس هېوادونو د مشرانو ۱۶مه سرمشريزه د اکتوبر په ۲۲مې نېټې د روسيې په کازان ښار کې پيل شوې او تر ۲۳مې نېټې پورې به دوام ولري او دا د نويو غړيو له منلو وروسته د دغه سازمان لومړۍ سرمشريزه ده، چې د چين د دولت رئيس شي جين پينګ په شمول د څه باندې ۳۰ هېوادونو او نړيوالو سازمانونو مشرانو پکې ګډون کړی او د همکاريو او پرمختګ په اړه بحثونه کوي.
نړيوالو افکارو د برېکس مثبتې ارزونې کړي او د تايلنډ، کيوبا، سوريې او بلاروس په شمول له ۳۰ زياتو هېوادونو په دغه سازمان کې د غړيتوب هيله ښودلې ده.
پوښتنه دا ده، چې ولې برېکس د هرکلي وړ ګرځېدلی او دغه سازمان د غړو له زياتوالي وروسته څنګه کولی شي، چې زيات برياليتوبونه خپل کړي؟
د چين او عصري اسيا په چارو کې د روسيې اکاډمۍ د څېړنيز مرکز مشر کيريل بابايف سي جي ټي اېن سره په خبرو کې ويلي، چې برېکس همکاريز ميکانيزم د دغه سازمان د غړو هېوادونو د همغږۍ د وسيلې په توګه منځ ته راغلی او د انسانانو د راتلونکي د نويو هيلو نښه ده او د نړيوال اقتصاد د برابر پرمختګ په اړه د خلکو د هيلو استازيتوب کوي.
بابايف چين د دغو همکاريو د پياوړتيا عمده هڅوونکی ياد کړی او نوموړي په دغې خبرې د زياتو هېوادونو غږ انعکاس کړی دی.
په نړۍ کې داسې لوی بدلونونه روان دي، چې په تېرو سلو کالونو کې یې ساری نه دی لیدل شوی او برېکس په همدغسې حال کې د پرمختيايي هېوادونو لپاره د همکاريو او پرمختګ د بحثونو مهم ډګر ګرځېدلی او ورخلاصون، ټولشموليت او د همکاريو له لارې د ګډو ګټو موندنه یې د پرمختيايي هېوادونو ترمنځ د همکاريو اغېزمنه ځانګړتيا ده. برېکس ميکانيزم د پرمختيايي هېوادونو د ګډ پرمختګ غوښتنې ته ځواب ویلی دی.
برېکس د ۲۰۲۴م کال په جنورۍ کې د سعودي عربستان، مصر، عربي متحده امارات، ارجنټاين، ايران او اتوپيا غړيتوب اعلان کړی او دغه راز د برېکس د غړو هېوادونو نفوس د نړيوال عمومي نفوس نيمايي ته نژدې دی او د نړيوال اقتصاد د پرمختګ لپاره يې د خدمت انډول له ۵۰ سلنې زيات او اقتصادي حجم يې د جي ۷ ډلې په پرتله لوړ دی، چې د نړيوال اقتصادي پرمختګ لپاره لا پياوړی قوت برابرولی شي.
برېکس ميکانيزم په نړيوالې ادارې کې د مختلفو هېوادونو د ګډون لپاره يو ښه ډګر او فرصت برابر کړی دی. د نړيوالو چارو ايټالوي کارپوه والولي رسنيو ته ويلي، چې په نړۍ کې د سړې جګړې مفکوره او يواړخيزم د پورته کېدو په حال کې دی، خو برېکس بیا هم د ملګرو ملتونو د منشور د موخو او اصولو پر ساتنې ټينګار کوي او په سياسي لارو چارو د نړيوالو او سيمه ييزو مسئلو د حل لپاره هڅې کوي. نوموړي برېکس د نړيوالې سولې او پرمختګ لپاره ګټور بللی دی.
چين د برېکس د بنسټګر په توګه د دغه ميکانيزم ټينګ ملاتړ کوونکی او ګډون کوونکی دی او مهم لارښوونکی رول يې پکې لوبولی دی.
د برازيل د چيني چارو څېړنيز مرکز مشر روني لينس ويلي، چې چين د برېکس هېوادونو د ګډو نظريو د راغونډولو، د همغږۍ او همکاريو د پياوړتيا او د ګډو اجنډاوو د پرمخبېولو په برخو کې کليدي رول لوبوي.
نړيوال تمه لري، چې د برېکس سږنۍ سرمشريزه به د چين او د برېکس د نورو غړو هېوادونو تر ګډو هڅو لاندې نړۍ ته د ثبات امکانات او مثبت قوت برابر کړي او د پرمختيايي هېوادونو پياوړتيا به وهڅوي.
