د چين سوداګرۍ وزير وانګ ون تاو د اکتوبر په ۲۵مې نېټې د اروپايي ټولنې د کمېټې له مرستيال اجرائيوي رئيس او د سوداګريزې کمېټې غړي بروفسکي سره ويډيويي خبرې کړې دي. د پاملرنې وړ ټکی دا دی، چې نوموړي د اروپایي لوري په بلنې په يادې خبرو کې ګډون کړی دی.
ښاغلي بروفسکي پر يوې ټولنيزې رسنۍ ليکلي، هغه د اکتوبر په ۲۸مې نېټې په برازيل کې د جي شل هېوادونو د سوداګرۍ وزیرانو په غونډه کې ګډون کاوه او پر ځايي وخت د شپې له يوولسو بجو نه تر سهار وختي پورې له وزير وانګ ون تاو سره يې خبرې کړې دي.
کله چې د اروپايي ټولنې کمېټې د چين د برېښنايي موټرو پر وړاندې د حکومت د سباسيډۍ یا مالي مرستې ضد پلټنه اعلان کړه، نو بروفسکي همغه وخت هم پر اړيکو او خبرو تمرکز کړی و او تماس ساتنه يې د نظريو د توپيرونو د هوارۍ لپاره ښه بللې وه. بل د پاملرنې ټکی دا دی، چې دواړو لوريو په داسې حال کې دغه خبرې کړي، چې ټاکل شوې، اروپايي ټولنه به د اکتوبر له دېرشمې نېټې څخه د چين د برېښنايي موټرو پر وړاندې د ګمرکي تعرفې د زياتولو پرېکړه وکړي.
مالومات ښيي، دواړه خواوې په يادو خبرو کې مهمو ګډو نظريو ته رسېدلي چې خپلمنځي سلامشورې ته دوام ورکړي. په بله ژبه حتی د اروپايي ټولنې کمېټه د اکتوبر په دېرشمې نېټې د چيني برقي موټرو پر وړاندې د تعرفې د زياتولو پرېکړه وکړي، دواړه خواوې بیا هم کولای شي په دې هکله خپلمنځي خبرو اترو ته ادامه ورکړي او چين به د دغو تعرفو د لغوه کېدو لپاره له اروپايي لوري سره سلا مشورې او خبرې اترې وکړي. د دواړو لوريو د نوي پړاو سلا مشورو او خبرو اترو کې يو کليدي اصل دا ښودل شوی، چې دوی به د تر ټولو ټيټې بيې د ټاکلو له لارې اوسنۍ ستونزې لرې کړي یعنې د مساوي مشورو له لارې به د چين د برېښنايي موټرو تر ټولو ټيټه صادراتي بيه وټاکي. خو د دغې بيې د ژمنې تړون د لاسلیک لپاره تر ټولو مهم او مخکښ شرط متقابل باور دی او همدا په يادو خبرو کې د چين د هڅو بنسټ هم دی.
سرچينې وايي، چيني پلاوي په بروکسيل کې په ۲۵ ورځو کې له اروپايي لوري سره په اتو پړاوونو کې پنځوس ساعته خبرې او مشورې کړي، د دغو مشورو د پرمخبېولو لپاره يې ډېرې هڅې کړي او ډېر ارزښتناک وړانديزونه یې هم کړي دي، خو برعکس اروپايي لوري بیا صميميت نه دی ښودلی. د بېلګې په توګه اروپايي لوري په خبرو اترو کې د چين د حکومت له اجازې پرته له ځينو چيني تصديو سره خبرې کړي او هم يې په نورو لارو چارو يادې خبرې ځنډولې دي.
دواړو خواوو د يادو خبرو په ترڅ کې دا يادولي چې که څه هم دواړو خواوو په زياتو هڅو په ځينو برخو کې مثبت پرمختګونه کړي، خو د پام وړ مهمو مسئلو کې لا هم ستر توپيرونه موجود دي.
د دغو ټولو چارو لامل د اروپايي لوري پر ناسمو عملونو پسې تړاو لري. د اګست په ۲۴مې نېټې په خبرو اترو کې چيني استازي او د چين د ماشيني او برېښنايي توليداتو د صادراتو او وارداتو سوداګريزې ټولنې د اروپايي ټولنې کمېټې ته د برېښنايي موټرو د بيو د ژمنې په تړاو رسمي لايحه وړاندې کړه، خو دغې کمېټې تر هغه وروسته، چې د چيني لايحې څارنې سره یې موافقه وښوه، د ځينو تخنيکي جذيياتو په اړه بيا ستونزې جوړې کړې او پر چين يې غږ وکړ، چې د هر برانډ او ډول چيني برېښنايي موټر لپاره تر ټولو ټيټې بيې او حتی د اروپا بېلا بېلو هېوادونو او سيمو ته د صادراتو لپاره مختلفې ټيټې بيې وټاکي.
د اروپايي ټولنې د نامعقولو غوښتنو له کبله اړوندې خبرې او مشورې لا پېچلې شوې دي.
د شنونکو په اند، د اروپا اړتياوې او وړانديزونه نه شي عملي کولی او موخه يې دا ده، چې په دغو خبرو اترو کې لازياتې ګټې ترلاسه کړي.
چين د اروپايی لوري د ناسمو کړنو پر وړاندې بیا هم خپله رويه روښانه کړې او پر دې تمرکز لري، چې يادې خبرې باید د مساواتو او ګډو ګټو پر بنسټ ترسره شي. چیني او اروپايي تصدۍ د خنډونو جوړول نه، بلکې د ښه کاروبار په لټه دي.
اروپايي ټولنه به د اکتوبر په ۳۰مې نېټې وروستۍ پرېکړه وکړي او دا ورځ ته څه کم يوه اوونۍ پاتې ده. شونتيا کمه ده چې اروپايي لوری په دومره لنډه موده کې خپل دريځ بدل کړي، خو دواړه خواوې دې د ستونزو له هوارۍ مخکې خپلمنځي مشورو ته دوام ورکړي.
