نړۍ د امريکا د ۲۰۲۴م کال د ولسمشريزو ټاکنو کمپاينونه څاري او په تمه ده، چې د دغو ټاکنو پایله به پر نړيوال سياست او اقتصاد او د چين او امريکا پر اړيکو ښې اغېزې ولري.
په دې وروستيو کلونو کې د چين او امريکا اړيکې تاوجنې شوي او له ډېرو زياتو ننګونو او خنډونو سره مخ شوې دي.
شنونکي وايي، که ټرمپ او یا کماله هاریس د امريکا ولسمشريزې ټاکنې وګټي، نو له چين سره به یې پر اړيکو کوم مثبت اغېز ونه لري او د دواړو هېوادونو ترمنځ سوداګریزې شخړې او لانجې به همداسې دوام ومومي.
د چين او امريکا ترمنځ ډېرې نانندرۍ روانې وي، خو د تايوان، جنوبي سمندر او بشري حقونو په شمول پر ځينو مسئلو يې اختلاف دومره سخت شوی، چې د دواړو خواوو ترمنځ اړيکې يې لاپسې تاوجنې کړې دي.
شنونکي وايي، د چين او امريکا اړيکې پر نړيوال اقتصاد او سياسي جوړښت ژورې اغېزې لري او که ترمنځ يې دغه اړيکې ترينګلې او يا هم جنجالي وي، نو سیوری به یې پر نړۍ غورځي او ټول هېوادونه به زیان مومي. برعکس که د دواړو هېوادونو اړيکې ښې او ترمنځ يې همکارۍ روانې وي، نو نړيوال اقتصاد به ورسره سمسور او نور هم وغوړيږي.
شنونکي وايي، چين او امريکا بايد په بېلا بېلو برخو کې خپلمنځي تبادلې او همکارۍ پياوړې کړي، د نړيوالو مقابلو او ګواښونو پر وړاندې باید ګډه مقابله وکړي، د يو بل په مرکزي ګټو او مسئلو کې باید صبر او زغم ولري او سخت ګامونه باید پورته نه کړي او يوازې په همدې شرطونو د دواړو هېوادونو ترمنځ اړيکې ثابت او دوامدار پرمختګ موندلی شي.
خو په حقيقت کې چين پر امريکې باور نه لري او اړيکو ته یې خوشبين نه دی.
چين وايي، واشنګټن د بېجينګ په اړه ناسمې تګلارې کاروي او په ډېر غرور او بې رحمې ورسره مخ ته ځي.
چينايان که څه هم له امريکا سره اړيکو کې صميمت لري او هڅې کوي، چې اړيکې ورسره ښې کړي، خو د واشنګټن رويې ناهيلي او حتی غوسه کړي دي.
د چين د بهرنيو چارو وزير وانګ يي څه موده مخکې په څرګندو ټکو ويلي، امريکا هميشه ژمنې کوي، خو کړنې یې بیا برعکس وي او خپل وياړ يې له لاسه ورکړی دی.
نوموړي ويلي، امريکا چې کله هم د چين نوم اوري، نو اندېښنه او تشويش ورته پيدا کېږي او خپل باور یې بایللی دی او په خبره یې، امريکا يوازې په خپلو هيلو، سمسورتيا او پرمختګ پسې ګرځي، خو د نورو هېوادونو طبيعي پرمختګ ته هم اجازه نه ورکوي او نړيوال عدالت یې تر پښو لاندې غورځولی دی.
وانګ يي زياته کړې، امريکا د دې پر ځای د چين د پرمختګ مخه ونه نيسي، بايد په کوردننه خپلې مسئلې او ننګونې حل کړي او د خپلو خلکو ګټو ته باید زيانونه ونه رسوي.
د هر چا عملونه او کړنې د همغه کس د پوهې ښکارندويي کوي. امریکا په نړۍ کې د یوازیني سوپر طاقت په توګه، د ډېرو کارپوهانو ذهنونه هم خپل کړي او د تسلط له لارې د ثبات ساتلو فکر لري او په يو نړيوال سیسټم کې يې ځان ته د یو ځانګړي هېواد لارښوونکی حق ورکړی او همدغه کړنلاره يې روانه ساتلې ده.
امریکې په خپل تسلط او زور ارزښتونه جوړ کړي او جنګونه او جنجالونه يې د ستراتيژيکې پانګونې لپاره مناسبه لاره او خپله زورواکي یې د درناوي وړ بللې ده.
د امريکې دغو کړنو د چین او نړیوالې ټولنې اندېښنې راپورته کړې دي.
په حقيقت کې امريکا خپل تسلط غواړي او پر نورو هېوادونو زور اچول سم بولي، د جنګونو په وسیله اقتصادي پرمختګ کوي او جګړه يې یوه ستراتيژيکه پانګونه او د جنګونو او شخړو جوړول یې عمده فرهنګ او دود ګرځيدلی دی.
چين او نړۍ د امريکې د تسلطي نظريې پر وړاندې څنګه تشويش ونه کړي؟
غرور د تعصب په مانا دی، یعنې که څوک غرور کوي، نو هغه له نورو سره تعصب لري.
نړيوال هيله لري، چې امريکا له ولسمشريزو ټاکنو وروسته خپلې نظريې او مفهومونه بدل کړي او د نورو پر وړاندې مهربانه رویه غوره کړي، يو رښتنی ښه او عادلانه هېواد واوسي او د خپل مقام او توان له لارې د نړۍ خدمت وکړي.
چين هيله لري، چې امريکا د تاريخي پرمختګ عمومي تمايل وپېژني، د چين پرمختګ ته په سم نظر وګوري، فعال او واقعي تګ راتګ ورسره وساتي او د خپلمنځي اړيکو د ثابت، سالم او دوامدار پرمختګ لپاره یې هڅې وکړي.
