له نظره تر عمله او له ستراتيژۍ تر واقعيته
په پيرو کې د چانکای بندر د نومبر په ۱۴مه نېټه په رسمي ډول پرانيستل شو. د چين د دولت رئيس شي جين پينګ او د هغه پيرويي سيالې ډينا بولوارټې د ويډيو کنفرانس له لارې د چانکای بندر په پرانيستغونډه کې ګډون کړی و. د کمربند او لارې نوښت دغه پروژه چې د چيني کمپنيو له لوري پر مخ بېول شوې، د پيرو او اسيا تر منځ د مستقيمو انتقالاتو موده را کمولی شي. دغه راز د پيرو د ملي پراختيايي موخې ملاتړ هم کوي او دغه هېواد په لاتينه امريکا کې د اکمالاتي ځنځير پر يوه مهم دهليز بدلولی شي.
پيرو ته د رييس شي د سفر پر مهال د چين او پيرو تر منځ د همکاريو مهم هوکړه ليکونه لاسليک شول چې د ازادې متقابلې سوداګرۍ د هوکړه ليک نوي کول هم پکې شامل وو. په ۲۰۰۹ کال کې د ازادې متقابلې سوداګرۍ د اصلي هوکړه ليک له لاسليکېدو راهيسې چين د پيرو پر تر ټولو ستر سوداګريز شريک بدل شوی دی. په ۲۰۲۳م کال کې د دواړو هېوادونو د متقابلې سوداګرۍ حجمي ارزښت ۳۷.۶۹ ميلياردو ډالرو ته رسېدلی و او د پيرو ۴۰ سلنه صادرات چين ته شوي وو.
په سورينام کې چيني کارکوونکي کلي په کلي د لمريزې برېښنا پلنټونه جوړوي. دې هڅو په دغه هېواد کې پر ډيزلي برېښنا تکيه چې له کلونو راهيسې روانه وه، را کمه کړې ده. په جاميکا کې د چين له لوري د شمال – سويل لويې لارې جوړېدو د ګرځندوی مهم هدفونه سره نښلولي چې پخوا په ياد ټاپو کې د غرونو د يوې سلسلې له کبله يو له بله سره بېل شوي وو. ځايي خلک اوس د چين له لوري جوړ شوې دې لویې لارې ته د اقتصادي ودې د مهمې وسيلې په نظر ګوري.
پر زيربنايي پراختيا سربېره، چين د فقر او لوږې په کمولو کې خپلې تجربې هم له لاتينې امريکا سره شريکوي. د ګرينېډا د ملي پراختيا د ستراتيژۍ د مسودې په جوړولو کې مرسته، د کيوبا لپاره د صنعتي پراختيا د پلان په جوړولو کې مرسته، له السلوادور، ټرينېډاډ او ټوبيګو سره د بشري سرچينو د پراختيا په برخه کې مرسته په لاتينه امريکا کې د فقر د کمولو په برخه کې د چين د همکاريو وړې بېلګې دي.
د چين او لاتينې امريکا د بازارونو په نښلول کېدو سره د لاتينې امريکا ګڼ شمېر کرنيز او حيواني محصولات لکه د چلي الوبالو، مکسيکويي اوکادو، اکوادوري شريمپونه (سمندري خواړه)، د نيکاراګوايي غوايو غوښه او کلمبيايي قهوه د ميليونونو چيني وګړو کورونو ته رسيدلي دي.
د سراسري سويل د کليدي ځواک په توګه متحد کېدل
چين او لاتينه امريکا تل د ګډ برخليک لرونکې ټولنه وي. د بهرني فشار پر وړاندې د هغوی ګډ مقاومت، د خپلواکۍ لپاره مبارزې او د ښه ژوند لپاره د هغوی هڅو له لسيزو راهيسې د چين او لاتينې امريکا وګړي سره نږدې کړې دي. د چين او لاتينې امريکا تر منځ سياسي اعتبار لا پوخ شوی دی. چين لاتينې امريکا ته د څو قطبي نړۍ د مهم لوبغاړي په نظر ګوري او د لاتينې امريکا له هېوادونو سره خپلو اړيکو ته له ستراتيژيکې او اوږدمهالې زاويې ادامه ورکوي.
د چين – لاتينې امريکا اقتصادي او سوداګريزو همکاريو ستر تحرک موندلی دی. د روانې پېړۍ له پيل راهيسې د چين او لاتينې امريکا تر منځ سوداګرۍ چټکه وده کړې او په ۲۰۰۰م کال کې له ۱۲ ميلياردو ډالرو څخه په ۲۰۲۳م کال کې ۴۸۹.۰۵ ميلياردو ډالرو ته ورسېده، دغه راز یې روان کال ۵۰۰ ميلياردو ډالرو ته د رسېدو تمه کيږي.
د مالي همکاريو په برخه کې، چين او لاتینې امريکا د مالي همکاريو د پراختيا لپاره يو ميکانېزم رامنځته کړی دی. چين له ارجنټاين، برازيل، سورينام او چيلي سره د اسعارو د تبادلې تړونونه لاسليک کړي دي. چين او برازيل پر چيني يوان د سوداګريزو تادياتو د اجراء له پروسې تېر شول او وينزويلا اعلان وکړ چې د روسي روبل، ين، يورو او هندي کلدارو تر څنګ به د خپلو نړيوالو تادياتو په سيسټم کې چيني يوان هم شامل کړي.
د ګډ برخليک ټولنې د جوړولو او ګډ انکشاف د تعقيبولو لپاره طبيعي شريکان
د متحدو ايالتونو – لاتينې امريکا د دوديزو اړيکو پر خلاف د چين – لاتينې امريکا اړيکې پر متقابل درناوي ولاړې دي، د متقابلو ګټورو همکاريو پر بنسټ پر مخ بېول کيږي، د ورخلاصون او ټولشموليت پر بنسټ تعريفيږي او د ګډ انکشاف موخه تعقيبوي. چين او لاتينه امريکا ګډ کار کوي څو د مشارکت داسې ماډل رامنځته کړي چې له دوديزو اړيکو متفاوت وي. د چين – لاتينې امريکا اړيکې له نړيوالو تمايلاتو او تاريخي بهير سره په يوه ليکه کې دي چې د دواړو لورو د متقابلو ګټو د خونديتابه په خدمت کې دي. دغه مشارکت به په راتلونکي کې لا ډيرې لاسته راوړنې ولري او له بې اعتماديو ډکې نړۍ ته به ثبات ور وبښي.
