د عراقي پارلمان غړي: د امریکایي نظامیانو ستنول د ټرمپ انتخاباتي شعار دی

د عراق پارلمان کې د الفتح فراکسیون غړي وایي، له عراق څخه د امریکایي پوځیانو د ایستلو خبره د ټرمپ انتخاباتي شعار دی. کریم علوي له الاتجاه تلویزیوني شبکې سره په خبرو کې زیاته کړې، ټرمپ یو ځل بیا هڅه کوي په ورته شعارونو سره انتخاباتو کې رایې خپلې کړي. هغه ویلي، د امریکایي ولسمشر تېرو دروغو ته په پام د نوموړي پر خبرو باور نه دی په کار او په وینا یې، عراق باید په خپل دریځ ودرېږي او له هېواد څخه د امریکایي ځواکونو ایستل یقیني کړي. په ورته وخت کې د یاد فراکسیون یو بل غړي هم ورته څرګندونې کړې او زیاته کړې یې ده، ټرمپ تل ویلي چې په عراق کې د خپلو ځواکونو پر حضور ناخوښ دی خو حقیقت دا دی چې امریکا په عراق کې د اوږدمهاله حضور غوښتونکې ده.