د چین د دولت رئیس شي جین پينګ د نومبر له ۱۳ مې نېټې څخه تر ۲۳ مې نېټې پورې په پيرو کې د اسيا او ارام سمندر سيمې د اقتصادي همکارۍ سازمان يا ايپيک د مشرانو په ۳۱ مه غير رسمي غونډه کې ګډون وکړ، له پيرو څخه يې رسمي ليدنه وکړه، دغه راز په برازیل کې يې د شلو هېوادونو ډلې يا جي ۲۰ په ۱۹ مه سرمشريزه کې برخه واخیسته او له دغه هېواد څخه يې رسمي ليدنه وکړه.
د چين د بهرنيو چارو وزير وانګ يي د شي جين پينګ د ياد سفر د پای ته رسېدو په درشل کې رسنيو ته د نوموړي د دغه سفر په اړه معلومات ورکړل او په وينا يې، لاتينې امريکا ته د شي جين پينګ دغه سفر د دوستۍ او همکارۍ سفر دی، شي جين پينګ د دې ۱۱ ورځني سفر په موده کې په څه باندې ۴۰ دوه اړخيزو او څو اړخيزو فعاليتونو کې ګډون کړی او پر مهال يې د چين او نورو هېوادونو ترمنځ څه باندې ۶۰ همکاریز سندونه لاسليک کړي، چې نه يوازې يې د لویو هېوادونو ترمنځ اړیکو له ثابت او سالم پرمختګ سره مرسته کړې، بلکې د پرمختيايي هېوادونو ترمنځ د يووالي او د ځان بسياينې له ودې سره يې هم مرسته کړې ده. شي جین پينګ همدارنګه د دغه سفر پرمهال يوځل بيا له څواړخيزم ټينګ ملاتړ څرګند کړی دی.
لومړی، دغه سفر د اسيا او ارام سمندر سيمې د ورخلاصون او همکارۍ نوی مرحله پرانيستې ده.
د اسيا او ارام سمندر سيمې د اقتصادي همکارۍ سازمان د جوړېدو له ۳۵ کلونو راهیسې د دې سازمان په مرسته، د اسيا او ارام سمندر سيمه په نړۍ کې تر ټولو حياتي ځواک لرونکې اقتصادي سيمه او د نړیوال اقتصاد لپاره لوی خوځنده ځواک ګرځېدلې ده، خو په ورته وخت کې نړۍ نوې متزلزلې مرحلې ته داخله شوې او د يواړخیزم او پروټېکشنيزم يا د خپلې سوداګرۍ حمایت غوښتنې څپې پراخې شوې، چې د اسيا او ارام سمندر سيمې همکارۍ يې ګواښلې دي. رئیس شي جين پينګ لاتينې امریکا ته د دغه سفر پر مهال د دې سيمې له هېوادونو غوښتي، چې په ګډې همکارۍ پراخه ګټه رسوونکې او ټولشموله اقتصادي نړۍ رامنځته کړي، پر رښتيني څواړخيزم ټينګار ولري، د خپلمنځي همکارۍ پرانيستی او اتصالي ماډل جوړ کړي، د زرغون پرمختګ او نوښت پر اساس پرمختيايي خوځنده ځواک وپالي او د پراخ ګټه رسوونکي او ټولشموله انکشاف مفکوره عملي کړي.
دويم، دې سفر د پرمختيايي هېوادونو تمرکز د نړيوالې ادارې اصلاحاتو ته اړولی دی
په نړۍ کې له تېرې يوې پېړۍ راهیسې بې ساري لوی بدلونونه ګړندي شوي او د سراسري جنوب يا پرمختيايي هېوادونو اغېزې مخ په پراخېدو دي. په جي شل کې افريقايي ټولنه شامله شوې، اندونيزيا، هند، برازیل او جنوبي افريقا په نوبت سره پر له پسې څلور کاله د جي ۲۰ د رئيسه هېوادونو په توګه دندې ترسره کړې، چې پدې سره په نړیواله اداره کې د پرمختيايي هېوادونو د ونډو زياتولو ته فرصتونه برابر شوي. شي جين پينګ د برازيل په ريو جانيرو کې د جي شل سرمشريزه کې له نړيوال پرمختګ څخه د ملاتړ په پار د چين اته تدابيرونه اعلان کړي دي چې په لاندې ډول دي:
چين به د لوږې او بېوزلۍ پر وړاندې د مبارزې نړيواله اتحاديه کې شامل شي، له برازيل، جنوبي افريقا او افريقايي ټولنې سره به د پرانيستې نړيوالې علمي همکارۍ ګډ نوښت وړاندې کړي او لږ پرمختللو هېوادونو (LDCs) ته به يواړخيز ورخلاصون پراخ کړي.
درېیم، د دغه سفر پر مهال چين او پیرو د ګډو ګټو پر بنسټ د نړيوالې همکارۍ نوې نمونه جوړه کړې ده.
پيرو ته د شي جين پينګ د دغه سفر پرمهال د دواړو هېوادونو د مشرانو په حضور کې د دواړو هېوادونو ترمنځ د ازادې سوداګرۍ تړون د اصلاح هوکړه ليک او د دواړو هېوادونو لخوا د کمربند او لارې د ګډې ابادۍ د همکارۍ پلان لاسليک شوی دی. د يادونې وړ ده، چې دواړو مشرانو همدارنګه په انلاين ډول د پيرو د چانکی بندر د پرانيستنې په مراسمو کې ګډون کړی و. چانکی بندر د کمربند او لارې په چوکاټ کې يوه لويه پروژه ده او په فعاليدو سره يې ټرانسپورټي بيه او لګښت کم شوی او ځايي خلکو ته ګڼ شمېر کاري فرصتونه برابر شوي دي. د پيرو ولسمشرې دينا بولوارټ د دغه بندر پرانيستل د یاد هېواد ټولو خلکو لپاره د فخر وړ تاريخي شېبه بللې او په وينا يې، دغه لويه پروژه به د لاتينې امريکا د يووالي بهیر ته ډېره وده ورکړي او د پيرو د اقتصادي ودې نوی فصل به پيل کړي.
څلورم، د دغه سفر له لارې د چين او برازيل د ګډ برخليک ټولنې د ابادۍ نوی فصل شروع شوی.
برازیل ته د شي جین پينګ د دغه سفر پر مهال دواړو هېوادونو ګډه اعلاميه خپره کړې، چې له مخې يې د دواړو هېوادونو ترمنځ اړيکې د عدالت پر بنیاد ولاړې نړۍ او دواملرونکې کرې د جوړولو په لور د ګډ برخليک ټولنې ته پورته شوې او د چين”کمربند او لار“ نوښت د برازیل له پرمختيايي ستراتېژۍ سره پيوند شوی دی.
پنځم، دغه سفر د نړيوال مشارکت نوې بڼه رامنځته کړې ده.
شي جين پينګ د دغه سفر په موده کې له نورو مشرانو سره څه باندې ۱۰ دوه اړخيز ملاقاتونه وکړل، چې د امريکا له ولسمشر جوبايډن سره کتنه هم پکې شامله او د نړيوالې ټولنې ډېره پاملرنه يې راجلب کړې ده. شي جين پينګ جوبايډن ته په خبرو کې ويلي، که چين او امريکا یو د بل د ملګري پاتې شي او پر هغه اصل ټينګار ولري،چې په مهمو موضوعاتو باندې د نظر يووالي ته ځان رسوي او د ځينو کوچنيو ټکو په باب اختلافونه ساتي، نو خپلمنځي اړيکې به اوږدمهاله وده ومومي. برعکس که دواړه هېوادونه ځانونه يو د بل سيالان وګڼي او سيالۍ وکړي، نو اړيکې به يې له خنډونو سره مخ شي او آن شاتګ به وکړي. جوبايډن شي جين پينګ ته په خبرو کې ويلي، امريکا نوې سړه جګړه ، د چين د نظام بدلول او له متحدينو سره د اړيکو د پياوړتيا له لارې د چين پرخلاف ځواک تقويه کول نه غواړي، له چين څخه د تايوان له بېلتون غوښتونکو ملاتړ نه کوي، له چين سره جنجال نه پاروي او د سيالۍ په موخه د تايوان په مسئله کې خپلې ګټې نه لټوي. نوموړي زياته کړې، چې هېواد يې غواړي له چين سره خبرې او د متقابل د پايلو په اړه پوهاوی زيات کړي او په مسئولانه ډول د نظر توپيرونه کنټرول کړي.
شپږم، دغه سفر د چين د ورخلاصون د پراختيا پيغام ورکړی دی.
شي جين پينګ د دغه سفر په موده کې په خپلو خبرو، کتبي ويناوو او مقالو کې د چين د باکيفيته پرمختګ او د لوړې سويې د ورخلاصون په برخه کې د مهمو تدبيرونو په اړه معلومات ورکړي او هيله يې څرګنده کړې، چې نور هېوادونه د چين په پرمختګ کې له نغښتو فرصتونو څخه ګټې پورته کړي.
د ډېرو هېوادونو مشرانو شي جين پينګ ډېر تجربه کار او د درناوي وړ مشر بللی دی. د چيلي ولسمشر ګابريل بوریک د «شي جين پينګ او د چين حکومتوالي» کتاب څلورم ټوک چې په هسپانوي ژبه ژباړل شوی، له ځان سره د وړولو په وخت کې له شي جین پينګ سره وکتل. شي جين پينګ د ګابريل بوريک په بلنې پر دغه کتاب خپل نوم لیکلی او له بوريک سره يې ګډ عکسونه اخيستي دي.
د برازیل ولسمشر لولا ويلي، شي جين پینګ خلکو ته د ښېګڼو رسولو هڅه کوي او ټولنيز عدالت او انصاف ساتي، د جګړې، تقابل او تحریب نه، بلکې د سولې ، همکارۍ او ابتکار ملاتړ کوي، چې د نړۍ لپاره يې نمونه جوړه کړې ده.
د بيرو ولسمشرې دينا بولوارټ له رسنيو سره د مرکې پر مهال ويلي: شي جين پينګ مونږ ته رازده کړې، چې څنګه له بېوزلۍ څخه خلاص شوو او پیاوړی هېواد شو، هغه زموږ لپاره د زده کړې وړ نمونه ده.
