خوست کې د واده په مراسمو کې موټر سايکل بم چاودنه شوې، چې له امله يې ۱۲ کسانو ته مرګ ژوبله اوښتې. دغه پېښه تېره شپه لس نيمې بجې د دغه ولايت مرکز اړوند د کونډيو په ستر کلي کې شوې ده. د خوست د امنيې قوماندانۍ وياند عادل حيدر سپوږمۍ راډیو ته وویل، چې چاودنه د واده د هغو ګډونوالو په منځ کې شوې، چې د محلي سندرغاړو کنسرت ته راټول شوي وو. هغه وويل چاودنه کې څلور کسان وژل شوي او اته نور ټپيان دي، چې ټول ملکي وګړي دي. د حيدر په وينا، دغه واده د ملي اردو د يوه چارواکي و، چې هغوی ته په کې زيان نه دی رسیدلی. بل پلو د خوست د ملکي روغتون رییس ډاکټر سيد انور وايي چې دوی ته د پېښې له ځايه څلور جسدونه او دوه ټپيان ور وړل شوي دي. د پېښې مسووليت تردې دمه چا پر غاړه نه دی اخیستی.
