د امریکا د بهرنیو چارو وزیر مایک پومپیو یو ځل بیا ویلي چې هېواد یې افغانستان کې د تلپاتې سولې غوښتونکی دی او له سولې پروسې بشپړ ملاتړ کوي. نوموړي دا څرګندونې په قطر کې د بین الافغاني مذاکراتو په څنډه کې د ملي مصالحې عالي شورا له رییس عبدالله عبدالله سره په لیدنه کې کړې دي او زیاته کړې یې ده چې په دوحه کې د افغانانو ترمنځ لومړنۍ ناسته تاریخي وه او دوی هیله لري چې دا خبرې په افغانستان کې د تلپاتې سولې سبب وګرځي. په ورته وخت کې عبدالله پومپیو ته ډاډ ورکړی دی چې سوله د افغان دولت او ټولو افغانانو لومړیتوب دی او دوی ځکه قطر ته راغلي چې روانې اوږدې جګړې ته سوله ییزه حللاره ومومي.
