کرنې وزارت: سږکال به د خوست جلغوزیو حاصلات تر ۱۸زره ټنه ډېر وي

کرنې وزارت وایي، چې سږکال په خوست کې د جلغوزیو په حاصلاتو کې ۲۵ سلنه زیاتوالی راغلی دی. یاد وزارت د خوست کرنې ریاست په حواله ویلي، د دوی د ارزونې له مخې، روان کال به په دغه ولایت کې د جلغوزیو حاصلات ۱۸ زره او ۶۰۰ ټنو ته ورسېږي، چې د تېر کال په پرتله ۲۵ سلنه ډېروالی ښیي. د خوست ولایت د جلغوزیو ټولنې مشر او سوداګر شاهزاده وایي، سږکال ددې ولایت د جلغوزیو حاصلات زیات شوي، چې ورسره به په دغه ولایت کې د جلغوزیو په کاروبار د بوختو کسانو ژوند کې هم مثبت بدلون راشي. په ورته وخت کې، کرنې وزارت په پام کې لري، چې ددې محصول د پروسس، بسته بندۍ او له ضایعاتو څخه یې د مخنیوي په پار په خوست او پکتیا ولایتونو کې فابریکې جوړې او ددې محصول تولید، پراختیا، پروسس او پلور ته زمینه برابره کړي.