چين يوه باروړونکې بېړۍ، چې پکې د نوې انرژۍ ۵۰۰۰ موټرونه باور وو، څو ورځې مخکې د دغه هېواد د سو جو ښار له تای څانګ بندر څخه د بلژيک د زيبروګ بندر په لور خوځيدلې ده.
بي وای ډي يا د چيني موټر توليدوونکې تصدۍ د يادې بېړۍ د چارو مسؤليت پرغاړې لري او يوه مسوول يې د جنورۍ په ۱۳مې نېټې چين ميډيا ګروپ ته ويلي، چې تصدۍ يې تېر کال بهرنيو هېوادونو ته د نوې انرژۍ ۴۱۷ زره او ۲ سوه موټرونه صادر کړي او د خرڅلاو اندازې يې په نړيوالو بازارونو کې لومړی مقام نيولی دی. دغه مسوول ويلي، چې شرکت به یې بهر ته د چيني زرغونو توليداتو په صادرولو کې پوره مرستې وکړي او د ځايي سيمو د نوې انرژۍ صنعتي چارو ته به پرمختګ ورکړي.
د چين رسمي شمېرې ښيي، چې په تېر ۲۰۲۴م کال کې د دغه هېواد د وارداتي او صادراتي مالونو عمومي ارزښت ۴۳.۸۵ ټريليونو يوانو ته رسېدلی او نوی ريکارډ يې جوړ کړی دی او د وړم کال په پرتله ۵٪ زياتوالی ښيي.
له تېرو اتو کالو راهیسې هر کال د چین په صادراتو کې زیاتوالی راغلی دی. تېر کال د چين د صادراتي مالونو ارزښت په لومړي ځل له ۲۵ ټريليونو يوانو څخه واوښت، چې دا د وړم کال په پرتله ۷ اعشاریه یو سلنه زياتوالی ښيي. په دغه کال کې د چين د وارداتي مالونو ارزښت ۳۹/۱۸ ټريليونو يوانو ته رسېدلی، چې دا بیا د وړم کال په پرتله ۲ اعشاريه ۳ سلنه زياتوالی ښيي. چين د مالونو د لومړي لوی سوداګريز هېواد په توګه خپل مقام نور هم ثابت کړی دی.
یادې شمېرې ښيي، چې چين په درېيو برخو کې زياتوالی او لوړوالی موندلی دی.
۱. د چين د وارداتي او صادراتي مالونو ارزښت له ۴۳ ټريليونو څخه زيات شوی او دغه هېواد د څه باندې ۱۵۰ هېوادونو او سيمو لوی سوداګريز ملګری ګرځېدلی دی.
۲. په ۲۰۲۴م کال کې د چين د بهرنۍ سوداګرۍ د زياتوالي اندازه ۱/۲ ټريليونو يوانو ته رسېدلې، چې دغه رقم د يوه منځني هېواد د بهرنۍ سوداګرۍ له کلنۍ اندازې سره برابر دی.
۳. د چين د وارداتي او صادراتي توکو جوړښت ښه شوی او د نوښت او لوړې ټېکنالوژۍ ونډه يې مخ پر زياتېدو ده. د بېلګې په توګه، د دغه هېواد د صادراتي توکو په عمومي ارزښت کې د برقي او الکترونيکو توکو ونډه ۵۹ اعشاريه ۴ سلنې ته او د پرمختللو سامانونو د صادراتو زياتوالی یې ۴ سلنې ته رسېدلی دی.
د چين د بهرنۍ سوداګرۍ کلنی راپور د نړۍ لپاره څه ارزښت لري؟
چين نړۍ ته د زياتو زرغونو، نويو او باکيفيته توليداتو ترڅنګ، لوی بازار او ښه فرصتونه هم برابر کړي دي او په ۲۰۲۴م کال کې یې له بهرنيو هېوادونو څخه ۳ ميليارډه ټنه لوی سوداګريز توکي، د ۷ ټريليونو يوانو په ارزښت برقي لوازم او د ۸/۱ ټريليونو يوانو په ارزښت مصرفي توکي وارد کړي دي. دغو وارداتي توليداتو د چين مختلفې کورنۍ اړتياوې پوره کړي او اړوندو صادراتي هېوادونو ته يې د خپل لوی بازار ګټې رسولي او ټولو په ګډه پرمختګ موندلی دی.
بهرنۍ سوداګري د يوه هېواد د ملي اقتصاد د څار مهمه کړکۍ بلل کېږي. چين د نړۍ د دوهم لوی اقتصاد په توګه پر ورخلاصون، پرمختګ او همکارۍ ټينګار لري، د نړيوال صنعتي او اکمالاتي ځنځير ثبات يې ډاډمن کړی او د نړيوالې سوداګرۍ دوامدار او سالم پرمختګ يې هڅولی دی.
چين تېر کال په داسې حال کې پرمختګ کړی، چې نړيواله سوداګري د جيوپوليټېکس، يو اړخيزم او ځانې سوداګرۍ ساتونکې غوښتنې تر اغېزو لاندې او له سختو ننګونو سره مخ ده.
په ۲۰۲۴م کال د نړيوالې سوداګرۍ د زياتوالي انډول ۳ اعشاريه يو سلنه و.
د پيسو نړيوال صندوق په دې وروستيو کې اټکل کړی، چې په روان ۲۰۲۵م کال کې به د نړيوالې سوداګرۍ د زياتوالي انډول ۳ اعشاريه ۴ سلنې ته لوړ شي.
دا ددې ښکارندويي کوي، چې د بهرنيو اړتياوو د بيا لوړوالي تمايل روان دی او ورخلاصون او همکارۍ د ګردې نړۍ ګډې هيلې او غوښتنې دي.
چين د ننګونو د لرې کولو توان لري او د بهرنۍ سوداګرۍ سالم پرمختګ به وساتي او نړۍ ته به د پرمختګ نور زيات فرصتونه برابر کړي.