په افغانستان کې د چين سفارت او د افغانستان لنډ مهال حکومت په ګډه د جنورۍ په ۲۰مه نېټه د دغه هېواد په بهرنيو چارو وزارت کې د دواړو هېوادونو ترمنځ د ديپلوماتيکو اړيکو د ټينګېدو د ۷۰مې کاليزې د نمانځنې فعالیت تر سره کړ. په افغانستان کې د چين سفير جاو شينګ، د افغانستان د بهرنيو چارو وزارت سیاسي مرستيال شیرمحمدعباس ستانکزي، د افغانستان د حکومت د بېلابېلو ادارو، صنعتي، سوداګريزو او تعليمي ټولنو او په افغانستان کې د چیني سازمانونو استازو او مېشتو چينايانو په ګډون شاوخوا ۱۵۰ تنو په دې فعالیت کې ګډون درلود.
جاو شينګ په خپله وينا کې وويل چې د چین او افغانستان د ډيپلوماټيکو اړيکو د ټينګېدو له ۷۰ کلونو راهيسې د خپلمنځي عملي همکاريو په برخه کې ګټورې پايلې تر لاسه شوې دي او د دواړو هېوادونو د خلکو ترمنځ دوستي ورځ تر بلې ژوره شوې ده.
ستانکزي د افغانستان او چین ترمنځ د عنعنوي دوستۍ او د دوستانه همکاریو د پایلو ډېره ستاینه وکړه.